2.9% mas turista di estadia den e promé 11 lunanan di 2016

December 23, 2016

WILLEMSTAD- 22 di desèmber 2016 – Sifranan preliminar kolektá pa Ofisina di Turismo di Kòrsou (CTB) ta indiká un kresementu di 2.9% durante e promé 11 lunanan di aña 2016, esaki lagando afó e impakto negativo di Venezuela riba e kantidat di turista risibí durante e aña aki. E kantidat di bishitante registrá for di Venezuela a mustra un bahada e aña aki kousando un impakto negativo riba nos prestashon total. Pa e promé 11 lunanan di aña Venezuela a registrá un total di 28.894 turista ménos den e promé 11 lunanan, resultando den 34% ménos kompará ku aña pasá den mesun temporada.

Entre yanüari i novèmber di 2016, Kòrsou a registrá 401,728 turista, esaki ta un bahada di 5% kompará ku aña pasá. Nort Amérika a alkansá un total di 69,808. Un bahada den turistanan for di Sur Amérika, partikularmente Venezuela, a kousa un kaida di 23% den e region pa un registro total di 97,853 turista. For di Caribe a registrá 31,533 bishitante. Europa ku 188,472 bishitante a kontinuá ku un prestashon sólido ekivalente na un kresementu di 4% kompará ku e mesun periodo di 2015.

CTB i MEO ta hasi uso di e modelo ‘Turistika’ pa kalkulá e kresementu ekonómiko generá for di industria di turismo. Durante e promé 11 lunanan di 2016, sektor di turismo a generá un impakto direkto di $454.9 mion pa nos ekonomia lokal. Turistanan prosedente for di Europa a generá un total di $237.6 mion florin kual ta 52.2% di e totalidat. Nort Amérika, Sur Amérika i otro regionnan a generá respektivamente $91.9, $94.2 i $31.2 mion.

Turismo di estadia na luna di novèmber 2016
E merkadeo i promoshon hasí pa KLM Curaçao Marathon na Hulanda for di 2014 pa awor, ta mustrando resultadonan positivo. Na novèmber, Kòrsou a registrá 13,249 bishitante for di Hulanda, un oumento di 3% kompará ku e mesun periodo aña pasá. E kantidat di bishitante for di Alemania ku a keda registrá tabata un oumento di 4% alkansando un total di 2,371, esaki ta resultado di un bon konekshon aéreo. Total, a registrá 17,712 bishitante for di Europa, ekivalente na 1% di kresementu.

Festival i eventonan spesial ta un medio importante pa boost nos industria turístiko. E promoshon pa Summer Fall Festival i Curaçao Extreme Finals den koperashon ku CTB a mustra efektonan positivo. Region di Caribe a registrá un oumento di 6%, ekivalente na 3,220 bishitante den novèmber 2016. Aruba a krese ku 19%, i a registrá 1,569 bishitante.

Kòrsou a risibí 5,702 turista di estadia for di Nort Amérika na novèmber 2016; un bahada di 11%. Esaki ta resultado di un luna slow, ku no a duna e kresementu ku nos a antisipá. Caribe engeneral a pasa dor di un temporada mas slow; bishitantenan for di Merka a spar pa durante di wenter biaha pa destinashonnan Sur, un poko mas kalor. Luna di novèmber tabata un luna inpredesible i tenso, konsiderando elekshon na Merka. Esei mes a forsa merikanonan pa keda nan pais, vota i partisipá na kampaña miéntras ku e luna elektoral ta desaroyá. Kòrsou a registrá 4,671 bishitante for di Merka i 1,035 for di Canada.

Region di Sur Amérika a registrá un total di 6,728 turista. Maske ku e resultado di elekshon na Merka a afektá e kambio di dòler/peso negativamente, tòg a registrá mas bishitante for di Colombia kompará ku aña pasá. Na novèmber a registrá 1% di kresementu ekivalente na 1,193 bishitante for di Colombia. Konsistensia den marketing i un bon PR den e merkado na Brasil a duna resultadonan positivo durante di e último lunanan, i novèmber no ta un eksepshon. Brasil a registrá un kresementu di 61% ekivalente na 721 bishitante den novèmber.

Sifra kantidat di anochi
Na novèmber nos a registrá un kresementu averahe den kantidat di anochi pa estadia di 10%. Turistanan a keda un averahe di 8.1 anochi na novèmber. Aña pasa e kantidat di anochi averahe pa persona tabata 7.4. E kantidat di anochi ku e turista a keda riba nos pais na novèmber 2016 a konosé un bahada di 11%. Un total di 279.837 anochi a keda registrá kompará ku 313.805 na aña pasá. Esaki ta komo resultado di e bahada den kantidat di turista di estadia.

Download e sifranan.

Most recent