31 apartamentu i Small Hotels a keda sertifiká via di auditoria i kontròl di kalidat

April 25, 2017

WILLEMSTAD- 24 aprel 2017– Ofisina di Turismo di Kòrsou (CTB) ta komprometé pa hasi estadia di kada bishitante na Kòrsou unu inolvidabel. Pa sigurá esaki 3 aña pasá CTB den kolaborashon ku Curaçao Innovation & Technology Institute (CITI) a introdusí un programa di sertifikashon pa industria di hospitalidat i turismo. E ophetivo di e programa aki ta pa promové i mantené kalidat di tur empresa ku ta operá den nos industria turístiko mediante un sistema di auditoria. Resientemente a tene un seremonia di sertifikashon di e programa spesialmente diseñá pa Small Hotels i apartamentunan ku ta ofresé estadia na turista. Tres aña pasá a auditá tambe algun operador di buseo ku aworakí ta pendiente pa keda re-audita.

CITI ta enkargá ku ehekushon di e ‘Sustainability Certification Program’ di CTB. Tur apartamentu ku ta keda di hür ku turista lo keda auditá kada 2 aña basá riba standardnan di kalidat rekonosé den nos merkado lokal i internashonalmente. Ku hopi satisfakshon por anunsiá ku 31 apartamentu i Small Hotels a keda auditá éksitosamente durante e promé tanda. Ta trata di e siguiente apartamentunan: Mondi Lodge, Ban Topa Apartments, Frangipani Apartments, Sun Reef Village on Sea, Résidence L’Orangerie, Bahia Apartments & Diving, Home Sweet Home Curaçao, Curaçao Rental Homes, Quint’s Travelodge, Rancho El Sobrino, Lilu Apartments, Dolphin Suites, Hotel ‘t Klooster, Landhuis Bona Vista, Mustique Suites, The Beach House Curaçao, Pietermaai Boutique Hotel, Academy Hotel, Bon Biní Seaside Resort, Curaçao Exclusief, Jan Kok Lodges, My Dream Apartments, Adonai Hotel Boutique, Hibiscus Beach House, PM78 Urban Oasis Curaçao, Hersher Studio’s & Apartments, Cecil Paradise Apartments, Acoya Hotel Suites & Villas, B&B Sombré di Kabana, Piscadera Seaview Apartments i Guesthouse Toni Kunchi.

Partisipashon na e programa di kalidat ta kompletamente boluntario. Ta nifiká ku kada apartamentu ku a registrá pa e programa ta konsiente di e importansia pa ofresé estadia di kalidat na nos bishitantenan. CTB ta felisitá tur apartamentu i Small Hotels ku a pasa e programa i ku awor ta sertifiká. Próksimamente CTB lo inisiá un di dos tanda di auditoria i ke motivá tur Small Hotels i apartamentu ku ta hür ku turista i ku ainda no a registrá pa hasi esaki via di audit@citi.cw òf via di telefòn 738-6299.

Most recent