WILLEMSTAD- 9 sèptèmber 2015– Air Transat resientemente a anunsiá Kòrsou komo su destinashon di mas nobo. Total, e aerolinea tin 36 destinashon prosedente di Toronto, Canada. Kuminsando 20 di desèmber 2015, Air Transat lo tin buelonan direkto pa Kòrsou for di Toronto riba tur djadumingu te ku dia 3 di aprel di otro aña.
Pa kompletá e eksperensia Transat Tours lo ofresé biahenan inklusivo. Esaki ta nifiká ku tin posibilidat di kumpra pasashi i hotèl ku estadia den 4 hotèl, kualnan ta; Renaissance Curaçao Resort & Casino, Santa Barbara Beach & Golf Resort, Hilton Curaçao i Sunscape Curaçao Resort, Spa & Casino. Últimamente Kòrsou a konosé un oumento signifikante den turismo for di Canada. Esaki ta hasi Kòrsou e destinashon karibense ku a konosé mas kresementu di turistanan for di Canada di akuerdo ku statistiknan di Caribbean Tourism Organization.
Tokante di Transat Tours Canada:
Transat ta spesialisá den biahenan di vakashon pa tur kontinente. Transat Tours Canada ta desaroyá i alabes komersialisá un lista amplio di produkto, esaki ta inkluí entre otro vakashon pa destinashonnan ku tin playa, vakashon bou di guia i biahe krusero.
