Aprel, otro luna ekselente pa turismo di estadia

...24% kresementu den turismo di estadia...
WILLEMSTAD – 20 di mei 2019 – Ofisina di Turismo di Kòrsou (CTB) ta raportá otro luna mas kaminda a registrá riba 40 mil turista di estadia. E sifranan mas resien ta mustra un kresementu di 24% den turismo di estadia na luna di aprel 2019. Un total di 40.284 turista di estadia a keda registrá na aprel, un kantidat di 7.793 turista mas kompará ku aprel 2018.

Hulanda a registrá 7% mas turista di estadia na aprel. Total 16.151 turista di estadia a keda risibí for di e pais ku mas ta produsí pa Kòrsou. Alemania a registrá un prestashon ekstraordinario ku dòbel e kantidat di turista di estadia kompará ku e mesun periodo di aña pasá. Un kresementu di 106% a keda registrá pa un total di 2.243 turista di estadia prosedente di Alemania. Ta konosí ku alemannan ta gusta biaha durante temporada di Pasku di Resurekshon i e aña aki no tabata un eksepshon. Mientrastantu Europa kompletu a krese ku 18% produsiendo 21.620 turista na aprel.

E merkado di Nort Amérika ta sigui floresé ku 14 % kresementu na aprel 2019. E kresementu di dòbel sifra ta primordialmente atribuí na e kresementu di 23% den turista di estadia for di Estádos Unídos. Esaki ta prueba ku e lansamentu di e kampaña di branding nobo huntu ku e sosten kontinuo di nos partnernan ta kosechando su frutanan pa nos isla den forma di kresementu di turismo di estadia. Un total di 8.157 turista di estadia a keda risibí for di Nort Amérika den luna di aprel 2019.

Turismo di estadia for di Sur Amérika a presta bon registrando 67% kresementu na aprel 2019. Siman Santu kual e aña aki a kai na luna di aprel ta e temporada mas konosí den kual bishitantenan di Sur Amérika ta biaha partikularmente esnan prosedente di Colombia. Airlift adishonal tambe a hunga un papel importante den e kresementu registrá. Dia 11 di aprel, Wingo a lansa su servisio di dos biaha pa siman for di Bogotá pa Kòrsou. Miéntras aña pasá Avianca a agregá 4 buelo for di Bogotá. COPA Airlines tambe ta operando buelonan diario for di Panama pa Kòrsou kompará ku 4 buelo pa siman na 2018. Tur e akshonnan aki a oumentá turismo di estadia for di Colombia i Brazil. Colombia ku un total di 2.703 bishitante a registrá un kresementu di 218% den turista di estadia. Na mes momentu Brazil a krese ku 35% registrando 973 turista di estadia.

E kantidat total di anochi pa turista a krese ku 20% na aprel 2019. Total 345 mil anochi a keda registrá. Turistanan for di Europa a keda 224 mil anochi na Kòrsou kual ta un kresementu di 16%. Turistanan prosedente di Nort Amérika i Sur Amérika a keda un kantidat di respektivamente 54 mil i 44 mil anochi durante luna di aprel.

Turismo di estadia yanüari te ku aprel 2019
Turismo di estadia den e promé 4 lunanan di aña 2019 a krese ku 17%. Tur region menshoná a raportá kresementu. Total Kòrsou a risibí 167 mil turista di estadia di yanüari pa aprel 2019. For di Europa nos a risibí 87 mil turista na Kòrsou, un kresementu di 12%. For di Nort i Sur Amérika nos a risibí respektivamente 42 mil i 23 mil turista. Region di Nort Amérika a krese ku 19% miéntras Sur Amérika a krese ku 31%. Nos paisnan bisiña den Karibe a sòru pa 10 mil turista den e periodo aki kual ta un kresementu di 8%.

Download e sifranan.

 
By browsing curacao.com, you accept the use of profiling cookies either ours or third-party ones. More information about cookies and privacy policy.