CTB a repartí 226 sertifikado entre kursistanan ku a finalisá programa di training intensivo

November 6, 2014

WILLEMSTAD- 5 novèmber 2014:- Durante un selebrashon festivo Ofisina di Turismo di Kòrsou (CTB) a repartí 226 sertifikado entre e kursistanan ku a finalisá un programa di training intensivo di seguridat. E programa a konsistí di dos trayekto di training unu básiko kual a tuma lugá na sèptèmber i un trayekto avansá kual a tuma lugá 3 ku 4 di novèmber último. Un total di 60 di e kursistanan ku a sigui e promé trayekto a pasa tambe den e di dos trayekto di training. E programa di training a keda duná pa dr. Peter Tarlow ku ta un orador mundialmente konosí i un eksperto riba e impakto di krímen i terorismo riba industria turístiko i sr. Jason Keller ku ta konosí pa su eksperensia riba e tereno di seguridat personal. Durante di e selebrashon a hiba palabra Minister di Desaroyo Ekonómiko, sr. Palm, Presidente di POLITUR, sr. Josefa i dosente di e programa di training dr. Peter Tarlow. E kursistanan a risibí nan sertifikado na man di Minister Palm.

Meta prinsipal di e programa di training ta pa oumentá e nivel di konsiensia tokante medidanan di seguridat i protekshon, alabes perfekshoná e trabounan pa di e forma ei kontribuí na un ambiente mas sigur tantu pa e empleado komo esnan ku ta bishitá nos isla. Ademas di esaki e training a yuda e partisipante pa e ta mihó prepará pa identifiká, enfrentá i respondé riba menasanan direkto i indirekto. Tambe e training a prepará e partisipante pa diserní kada situashon i prevení insidentenan ku por perhudiká bida di e empleado, bida di e bishitante i e imágen di nos industria turístiko den su totalidat. E gruponan ku a partisipá na e promé trayekto di training a konsistí di POLITUR, Kuerpo Polisial Kòrsou, Konsulado Merikano, duana, imigrashon, agentenan di seguridat na aeropuerto, haf, hotèl, playa i tambe diferente personal di seguridat privá ku ta laborá den e arianan turístiko. Na e training avansá a partisipá: imigrashon, Kuerpo Polisial Kòrsou, POLITUR, personal di CPA i CAP.

E promé trayekto a konsistí di diferente tópiko manera entre otro: (1) seguridat di turismo i servisio na kliente, (2) seguridat di turismo i diferente kultura, (3) seguridat di turismo i e industria turístiko, (4) turismo i terorismo, (5) turismo i desaroyo di komunidat i (6) komportashon di e bishitante. Durante di e training avansá a konsentrá riba: (1) e arte pa skucha ku atenshon pues trata na konsentrá riba loke e turista ta bisa, (2) e body language di e personal di seguridat, e importansia di kontakto ku wowo, mustra atenshon i empatia ora ta trata ku e turista, (3) problemanan ku por afektá seguridat di e turista i (4) importansia di un bon relashon entre polis, sektor di seguridat i sektor di turismo. E promé trayekto a konsistí di un parti teorétiko i práktiko, e di dos trayekto a konsistí di un parti teorétiko so.

Durante di e selebrashon a hasi uso tambe di e oportunidat pa duna rekonosementu na 2 agente di POLITUR, sr. Nelson Janzen i sr. Milangelo Leito komo muestra di apresio pa nan asistensia ekstraordinario na algun turista Brazilero ku a pèrdè nan pertinensianan ku a keda hòrtá. Minister Palm a hasi entrega di un award di “Dushi Hende” na e dos agentenan.

CTB ta gradisí Curaçao Ports Authority, Curaçao Airport Holding i Curaçao Airport Partners pa nan kontribushon na realisashon di e promé trayekto di training. E programa di training di seguridat aki a yuda ekipá empleadonan ku e hèrmèntnan nesesario pa atendé insidentenan ku por tin influensha direkto riba nos industria turístiko.

Most recent