CTB a sera kampaña ‘De Leukste Straat van Nederland’ ku Fiesta den Kaya

October 29, 2018

WILLEMSTAD – 26 di òktober 2018 – Resientemente a tuma lugá na Hulanda kulminashon di e kampaña di Ofisina di Turismo di Kòrsou (CTB) yamá ‘De Leukste Straat van Nederland’. Durante temporada di zomer a pidi públiko hulandes pa traha un video kòrtiku den kua nan ta splika dikon nan kaya ta esun mas great di Hulanda. Despues ku públiko a vota pa e mihó 10 videonan, CTB a tuma e desishon final. E ganadó su kaya a keda transformá kompletamente den esfera di Kòrsou durante di e ‘Nationale Burendag’.

Yarah, habitante di De Kersenakker na Utrecht, Hulanda a pèrkurá pa su video sobresalí entre tur video ku a keda mandá aden, i asina a bira e ganadó di e kampaña‘De Leukste Straat van Nederland’. E selebrashon tabata hopi spesial. E ganadó Yarah, a komentá ku kasi e no por a rekonosé su kaya mas. “Tabatin algu pa tur edat, pero finalmente e meta tabata pa nos por a festehá estilo di Kòrsou ku tur bisiña. Ta p’esei nos ta ‘De Leukste Straat van Nederland’.

E Chef yu di Kòrsou, Justin Niessen a pèrkurá pa tur hende disfrutá di un kushina netamente ‘krioyo’ inkluyendo un barbekiú estilo di Kòrsou. Brasbènt K-RIBE a sòru pa pone e habitantenan baila i selebrá nan título komo ‘De Leukste Straat van Nederland’. Durante di e ‘fiesta den kaya’ CTB a rifa un biahe di 9 dia pa Kòrsou, pa 4 persona inkluyendo estadia na Santa Barbara Beach & Golf Resort Curaçao. Famia Vennooij a resultá ganadó di e fakansi aki. CTB por mira bèk riba un eksitoso kampaña promoshonal na Hulanda.

Most recent