CTB a start ku Kurso di Servisio na Kliente

WILLEMSTAD – 21 di mei 2019 – Servisio na kliente ta un ‘mindset’ ku ta hiba na un aktitut di duna prioridat na ofresé un servisio ku ta kai na agrado di e kliente. P’esei duna servisio di kalidat ta eksigí un kambio den kondukta kaminda e persona ku ta duna servisio ta konsiente di su ambiente, sa kiko e kliente ke i ta pone atenshon na e produkto i servisio ku e ta ofresé na e kliente. Saliendo for di e pensamentu aki Ofisina di Turismo di Kòrsou (CTB) a start entrante 20 di mei ku un kurso di Servisio na Kliente spesialmente pa esnan ku ta den kontakto direkto ku e turista.

E kursistanan ta repartí den grupo di kada biaha 15 persona. Ta trata aki di empleadonan di Kuerpo Polisial Kòrsou, Imigrashon, kuerpo di Duana ubiká na aeropuerto, Curaçao Ports Authority (CPA) i Curaçao Airport Partners (CAP). E kurso ta konsistí di e siguiente modulonan: Servisio na bo òrdu!, Komunikashon efektivo, Kon pa atendé den situashonnan difísil i Bai e ‘extra mile’. E trayekto di e kurso lo kontinuá te ku luna di sèptèmber próksimo. Kordinashon di e kurso ta den man di Teamwork Curaçao.

CTB ta gradisí tur e instansianan ku ta partisipá na e trayekto i ta deseá e kursistanan hopi éksito. Riba foto e promé grupo ku a start ku e kurso den kompania di direktor di CTB, sr. Paul Pennicook, representantenan di CTB i e treinernan.

 
By browsing curacao.com, you accept the use of profiling cookies either ours or third-party ones. More information about cookies and privacy policy.