CTB ta duna rekonosementu di Dushi Hende na Chef Broertje Marshall

August 2, 2016

Willemstad – 2 di ougùstùs 2016 – Resientemente, Charlwin ‘Broertje’ Marshall a gana medaya di oro den un kompetensia kulinario na Bolivia. Chef Broertje Marshall ta masha stimá den nos komunidat i tin un trayektoria basta largu den e mundu kulinario i ta partisipá na mínimo 3 kompetensia internashonal pa aña. E aña aki Chef Broertje Marshall a kompetí kontra 29 kòki for di entre otro Nort Amérika, Sur Amérika, Karibe i Europa den e kompetensia Ame Tauná na Bolivia i a gana medaya di oro den e kategorianan di mihó plato i mihó presentashon.

E kompetensia gastronómiko Ame Tauná ta un di e eventonan di mas importante na Bolivia i anualmente ta reuní e mihó profeshonalnan di rònt mundu den ámbito di gastronomia. Esaki ta un plataforma ideal pa promoshon turístiko. CTB ta masha orguyoso ku e prestashonnan di Chef Broertje Marshall; semper e sa di involukrá Kòrsou den kada kompetensia, hasiendo su logro un logro di nos tur. Esaki ta un di e karakterístikanan di un Dushi Hende. E manera kon Chef Broertje Marshall ta promové Kòrsou, su kultura i nos turismo sigur ta di aploudí.

Pa e motibu aki mes CTB a organisá un ‘meet & greet’ na Academy Hotel Curaçao kaminda Chef Broertje Marshall a prepará su plato ganadó i un dushi pasaboka ‘Guyaba Kòrsou’ pa tur invitado i prensa. Durante e ‘meet & greet, Chef Broertje Marshall a interkambiá ku e hóbennan studiante di Academy Hotel Curaçao i asina duna nan algun tep i motivá nan pa sigui ku nan estudio. Na final di e atardi Minister di Desaroyo Ekonómiko sr. Eugene Rhuggenaath, Minister di Maneho di Gobernashon, Planifikashon i Servisio Públiko sr. Etienne van der Horst i Minister di Enseñansa, Siensia, Kultura i Deporte sra. Irene Dick a entregá Chef Broertje Marshall e Dushi Hende Award. E rekonosementu aki mester sirbi komo estímulo pa e sigui hasi e bon trabou komo nos embahador kulinario. CTB manera semper lo sigui asistié pa yuda promové nos isla. E luna aki Chef Broertje Marshall lo kompañá CTB na e evento Sabor Barranquilla na Colombia pa asina promové nos kushina lokal.

Lista kompletu di tur e premionan ku Chef Broertje Marshall a gana den su trayektoria:
2005: Cacique de oro Internacional – “La Excelencia Profesional.”
2012: Copa Culinaria de Las Américas / Trujillo-Perú. “Medalla di plata”
2012: Piura- pasión por la cocina – Perú
2012: Cocineros sin fronteras ‘Honra de Mérito-Encuentro Gastronómico’ / Lima-Peru.
2012: Medaya di oro –Cumbre Chiclayo
2012: Medaya di oro – Gastronómico Internacional / Loja-Ecuador.
2013: Bach di oro – Aregala Iinternacional /Chiclayo – Perú
2013: Plaka di oro – Gastrofest / Bursa-Instanbul -Turkia.
2013: Plaka di marmer – Executive Chef’s Club of “Greece” Honorary Award / Turkia.
2014: Medaya di oro – Encuentro Internacional Buenos Aires / Argentina.
2014: Medaya di oro – Seminario Internacional de Gastronomia / Buenos Aires-Argentina
2015: Medaya di oro “Aregala” Gastronómicos de Las Américas / Lima-Perú.
2015: Medaya di oro Cocinando en las alturas la paz/Bolivia.
2015: Medaya di oro Gastrónomos de Bolivia Internacional.
2015: Medaya di Fraternidad Chefs 4×4 Internacional.
2016: Medaya di oro – Ame Tauná / Santa Cruz-Bolivia

Most recent