WILLEMSTAD – 31 di yüli 2014:- Ofisina di Turismo di Kòrsou (CTB) huntu ku Minister di Desaroyo Ekonómiko, sr. Stanley Palm ku grato plaser a risibí e notisia ku KLM lo agregá 2 vuelo mas pa Kòrsou entrante novèmber 2014.
Adishonal di e vuelonan diario ku KLM ta ofresé entre Amsterdam i Kòrsou, entrante novèmber 2014 lo tin vuelo èkstra riba djaluna i djarason ku lo tin un orario di salida mas lat for di Amsterdam ku ta brinda mas oportunidat pa otro destinashon den Europa konektá riba e ruta. Den e periodo di fin di aña lo tin 2 vuelo adishonal pa akapará e demanda den e ‘holiday season’
Sigun Minister Palm ‘ E merkado Europeo ta unu hopi importante pa nos isla, e vuelonan adishonal lo fortalesé e merkado aún mas’.
CTB den estrecho koperashon ku CHATA lo bai prepará i ehekutá un plan di merkadeo agresivo pa por logra trese mas turista for di Europa riba e vuelonan adishonal aki.
Esaki ta otro paso pa engrandese e turismo di Kòrsou.
Pa mas informashon di vuelonan di KLM por check: www.klm.com.
