WILLEMSTAD- 19 di febrüari 2016– E konosido kómiko, figura públiko i presentadó di televishon merikano, Steve Harvey durante di e último añanan a posishoná su mes den tòp di programanan di televishon. Resientemente durante di un edishon di ‘Steve Harvey Show’, Ofisina di Turismo di Kòrsou (CTB) a regalá ‘Jackie i Matt’ un estadia pa Kòrsou.
E fragmento ‘Their Love Brought Back His Memory’ di e show di Steve Harvey a kousa un impakto grandi, kontando e testimonio di un pareha resien kasa ku nan bida a kambia por kompletu, na momentu ku Matt a pèrdè su memoria a konsekuensia di un aksidente outomobilístiko. Danki na e amor grandi di Jackie, Matt a logra haña su memoria bèk. Nunka nan tabatin oportunidat di bai un luna di miel. Na final di e entrevista Steve Harvey ta sorpresá e pareha ku un estadia di 5 anochi na Papagayo Beach Hotel, opsekio di CTB.
E show tin un oudiensia di aproksimadamente 2.6 mion televidente tur dia, esaki mes tabata motibu sufisiente pa e gana un Emmy Award na 2014 i 2015 den kategoria “Outstanding Talk Show Informative”. Gran mayoria di su oudiensia ta hende muhé entre 25 i 54 aña di edat. Diariamente e damanan ta sintonisá Steve Harvey su programa. Su página www.steveharveytv.com tin un averahe di 1,155,250 views pa luna i 876,000 bishitante mensual. CTB ta kontentu ku e kobertura ku Kòrsou a risibí durante di e programa di Steve Harvey. Pa mira e programa bishitá e link: http://bit.ly/21bAQNv
