WILLEMSTAD – 2 di mei 2018 – Ofisina di Turismo di Kòrsou (CTB) a sera un partnership ku CBS (WFAN) kual ta e stashon di radio mas skuchá den e aria di Tri-State na New York, pa asina por aliniá ku e marka mas íkono den deporte. E meta ta pa saka lo máksimo for di e poder i alkanse di e radio di Yankees pa asina posishoná Kòrsou komo e partner di biahe prinsipal. Pa e kampaña a traha riba un plataforma kompletamente integrá pa asina showcase Didi Gregorius i Kòrsou. E kampaña ta dirigí riba e merkado di Nortamérika.
Manera nos tur sá, Didi Gregorius ta e shortstop di New York Yankees. E kampaña ta enserá ku Kòrsou ta keda menshoná kada biaha ku Didi bini na bate kuminsando dia 2 di mei awor. Pa kada “home run” ku Didi dal durante wega, un “fan” ta gana un trep pa Kòrsou. Didi su prestashon aktual den e último weganan sigur lo bai hunga un ròl importante den ehekushon di e kampaña. E kòntèst ta dirigí riba konsumidónan den e aria di Tri-State na New York i tambe tur “fan” di New York Yankees. Den kuadro di e kampaña a traha un página online spesialmente pa partisipá na e kòntèst “Curaçao Home Run”. E weganan ku ta kualifiká pa e kòntèst aki ta e promé 28 weganan regular di e temporada di New York baseball den kual Didi ta na bate. E weganan aki ta riba skema pa ser hungá entre 2 di mei te ku djadumingu 30 di sèptèmber 2018. Partnernan eksklusivo pa e kampaña aki ta Papagayo Curaçao ku ta sòru pa e estadia i JetBlue Vacations pa e ticket.
Alabes CTB a lansa tambe den luna di aprel su kampaña #ThisIsCuracao den kual ta figurá Didi. E kampaña aki ta vigente te ku dia 25 di mei próksimo. Meta prinsipal di e kampaña ta pa krea un konekshon entre Kòrsou i Didi ku e merkado di Nortamérika. Komo parti di e kampaña #ThisIsCuracao, CTB a produsí un video promoshonalden kual Didi ta laga e futuro bishitante sera konosí ku loke e gusta di Kòrsou i su sitionan faborito.Durante e video por mira Didi ta relahá na Cas Abou Beach, praktiká gòlf na Blue Bay, kome na Komedor Krioyo na Lanthùis Dokterstuin, bishitá nos sentro di siudat i Pietermaai i tambe atmirá e pinturanan riba muraya pintá pa e pintor Francis Sling. E video tin ya kaba 133 mil views demostrando e popularidat grandi di ‘nos’ Didi. E partnership promoshonal ku Didi ta permití míles di hende sera konosí ku nos destinashon. Ademas CTB a lansa tambe un página spesial esta www.curacao.com/thisiscuracao riba kua ta kompartí diferente historia kòrtiku di Didi su sitionan faborito.
Pa kompañá e promoshon #ThisIsCuracao, CTB a lansa un kampaña riba medionan sosial kaminda ta invitá e konsumidó den e Tri-State aria di New York pa bishitá e página di Facebook di Curacao i ‘share’ e video. E partisipante tin chèns di gana un biahe ku JetBlue Vacations pa Kòrsou i un estadia na Floris Suite Hotel Spa & Beach Club.
