Diálogo Demokrátiko pa yega na un ‘Destination Development Plan’ pa Kòrsou

WILLEMSTAD - 27 di sèptèmber 2019 – Riba Dia Mundial di Turismo, 27 di sèptèmber 2019, Ofisina di Turismo di Kòrsou (CTB) den estrecho koperashon ku Ministerio di Desaroyo Ekonómiko (MEO), Curaçao Hospitality & Tourism Association (CHATA) i United Nations Development Programme (UNDP)a tene un Diálogo Demokrátiko dirigí riba Turismo. Meta di e Diálogo Demokrátiko tabata pa risibí idea ku lo por keda usá na momentu di formulashon di e Plan Stratégiko pa Desaroyo di Destinashon Turístiko dirigí riba Kòrsou (Destination Development Plan). Durante di e apertura a hiba palabra Minister di Desaroyo Ekonómiko, sra. Giselle Mc William i CEO di CTB sr. Paul Pennicook.

Despues di e apertura ofisial, a sigui primeramente un presentashon kaminda tur presente por a haña un bista general di e industria di turismo. Un total di 70 persona a partisipá na e diálogo. Ta trata aki di personanan for di sektor públiko i privá, organisashonnan no-gubernamental (NGO) i komunidat. E diálogo a tuma lugá den grupo ku asistensia di e fasilitadonan di UNDP. E gruponan a haña 3 diferente pregunta pa dialogá riba dje. For di e diálogo den grupo, a sali puntonan di prioridat ku a keda skohe di forma demokrátiko pa tur presente.

Durante pousa e partisipantenan por a partisipá na diferente workshop dirigí riba ‘experiential tourism’ presentá pa empresarionan lokal. Na final e prioridatnan ku a keda presentá tabata generalmente enfoká riba formanan di transporte alternativo pa di e manera ei brinda oportunidat na nos bishitantenan pa eksplorá nos isla. Tambe e partisipantenan a sugerí pa eksplorá e posibilidat pa ofresé más eventonan kultural den sentro di siudat.

Minister Giselle Mc William i sr. Paul Pennicook a ekspresá nan satisfakshon pa e manera kon e diálogo a kana i a gradisí tur ku di un manera demokrátiko a sa di trese nan sugerensianan i rekomendashonnan dilanti.

 
By browsing curacao.com, you accept the use of profiling cookies either ours or third-party ones. More information about cookies and privacy policy.