WILLEMSTAD- 4 di aprel 2016 – Ofisina di Turismo di Kòrsou (CTB) por medio di e komunikado aki kier informá lo siguiente. Despues ku CTB a tuma nota di informashon i potrètnan riba retnan sosial relashoná ku e manera ku a deshasí di algun karchi di embarkashon i desembarkashon (e asina yamá ED card) nos ta haña ku ta importante pa duna un splikashon di esaki. For di e ED cards, CTB ta kompilá diferente informashon pa asina analisá desaroyo di turismo. Ta trata aki di e karchinan ku turistanan ta yena na nan yegada aki na Kòrsou. Ta asina ku pa basta aña kaba CTB tin un kontrato ku e kompania Van Rumpt Recycling, kual ta sertifiká pa shred dokumento i datonan priva. Despues ku e karchinan keda prosesá na CTB, Van Rumpt Recycling ta kolekta e karchinan i ta shred i resiklá esakinan.
Pa loke ta trata e potrèt ku a keda publiká kaminda por mira algun ED cards den un kònteiner di shushi patras di e edifisio di CTB, mester bisa ku ta trata aki di karchinan ku den proseso di limpiamentu di e sitio di archivo di CTB lamentablemente esakinan a keda benta afó. Ta trata aki di karchinan di mas di 5 aña pasa ku pa un motibu òf otro no a bai pa keda di shred pero a keda atras den e sitio di archivo. E proseso normal ta ku tur karchi ta keda eliminá promé ku deshasí di esakinan. CTB ta lamentá ku e karchinan aki no a keda eliminá konforme e prosedura normal. Entretantu a tuma medidanan interno pa algu asin’aki no mester tuma lugá mas den futuro.
