Estudio di Investigashon pa Evalua kampaña di konsientisashon Kòrsou ta Dushi. Bib’é. Stim’é

...Ofisina di Turismo di Kòrsou i ICUC ta kondusí...
Willemstad – 11 di yüli 2019 – Entrante e siman aki Ofisina di Turismo di Kòrsou (CTB) ta kuminsá ku un investigashon dirigí riba e kampaña di konsientisashon ‘Kòrsou ta Dushi. Bib’é. Stim’é.’ E investigashon lo tin un durashon di mas o ménos 3 siman.Na sèptèmber 2017, CTB a lansa e kampaña di konsientisashon ‘Kòrsou ta Dushi. Bib’é. Stim’é’. Ophetivo di e kampaña ta pa konsientisá habitantenan di Kòrsou riba e privilegio di ta biba na Kòrsou i di ta forma parti di e komunidat di Kòrsou. E kampaña kual ta dirigí riba nos komunidat kompletu, ta stimulá pa hasi nos mas orguyoso di nos kultura, naturalesa i historia. E resultadonan di e estudio di investigashon lo keda presentá na novèmber di e aña aki.

Anteriormente, na respektivamente 2006 i 2014, CTB a kondusí dos estudio separá pa determiná entre otro e konosementu lokal, aktitut i persepshon riba desaroyo di turismo na Kòrsou. E estudio di 2006, por ehèmpel a indiká ku un porsentahe relativamente haltu (68%) di nos komunidat a ekspresá ku turismo ta masha importante pa ekonomia di Kòrsou, miéntras 63% a indiká ku nos komunidat ta benefisiá di turismo. Den e estudio di 2014, a evaluá e kampaña di konsientisashon di e tempu ei, esta “Dushi Hende”. Mas di 70% (71.9%) a indiká ku nan tabata konsiente di e kampaña ku CTB a kondusí durante di 2 aña, miéntras ku 63.6% di esnan enkuestá a indiká ku e kampaña a kontribuí na mehorashon di komportashon di nos komunidat relashoná ku turismo.

E biaha aki, CTB konhuntamente ku ICUC ta bolbe kondusí un estudio di investigashon kual lo konsentrá riba e kampaña di konsientisashonku e último tempu a ser presentá esta ‘Kòrsou ta Dushi. Bib’é. Stim’é’. E resultado di e investigashon aki lo duna CTB informashon balioso riba e kampaña mes komo tambe tokante komunidat su persepshon i komprendementu di desaroyo di turismo na Kòrsou. Lo hasi e enkuesta bou di mas o ménos 400 habitante na Kòrsou, repartí den diferente bario den un forma representativo. Komo identifikashon tur enkuestadó ku ta forma parti di e investigashon aki lo tin un identifikashon di CTB, nan identifikashon personal i un T-shirt blanku bistí.

Bou di tur persona ku partisipá na e investigashon lo rifa 4 premio patrosiná pa: Eric’s ATV Adventures, Pelican Boat Trips, The Aloe Vera Plantation i tambe Dinah Veeris’ Den Paradera Herb Garden. CTB ta hasi un apelashon na pueblo di Kòrsou pa koperá ku e investigashon importante aki i ta gradisí di antemano pa e koperashon. Pa kualke informashon adishonal por tuma kontakto ku CTB na 434-8200.

 
By browsing curacao.com, you accept the use of profiling cookies either ours or third-party ones. More information about cookies and privacy policy.