Febrüari 2016 a krese ku 4%

…Un total di 151 mion florin a keda generá…
WILLEMSTAD- 1 di aprel 2016 – Sifranan preliminar kolektá pa Ofisina di Turismo di Kòrsou (CTB) ta indiká ku pa luna di febrüari 2016 a registrá un kresementu di 4% kompará ku febrüari 2015. Un total di 41.106 turista di estadia a keda registrá ku ta 1.558 turista mas kompará ku febrüari aña pasa kaminda un kantidat di 39.548 turista a bishitá Kòrsou.

E énfasis ta riba merkado di Europa ku un kresementu sólido di dòbel sifra. Europa a krese ku 14% na febrüari 2016 ku un total di 19.278 turista di estadia. Hulanda, e pais ku mas a kontribuí na e kresementu aki ta representá 35% di e total di turista ku a bishita Kòrsou na febrüari 2016. Un kresementu di 12% a keda registrá for di Hulanda ku den sifranan apsoluto ta 14.431 turista di estadia. Alemania tambe ta prestando di forma ekselente, registrando kresementu di 11% ku un total di 1.814 turista den luna di febrüari. Aña pasa e kantidat aki tabata 1.627.

E region di Nort Amérika a registrá un kresementu di 7%. Un total di 8.868 turista a keda registrá kual ta 22% di e total di turistanan ku a bishita nos pais den luna di febrüari. Despues ku for di aña pasa ta registrando kresementu di dos sifra for di Estado Unídos, e luna aki por nota un bahada leve di 1%. Ya kaba CTB huntu ku sektor priva ta preparando programanan di merkadeo pa e periodo abou di turismo kual ta luna di mei i yüni. For di Canada a registrá un total di 3.160 turista di estadia kual ta un kresementu di 26%. E esfuersonan kontinuo di merkadeo den Canada ta mustrando nos e resultado positivo aki. E prestashon positivo di e merkado aki ta sigui yena nos ku hopi satisfakshon.

Turismo di estadia for di region Karibe na luna di febrüari a krese ku dòbel sifra ku un kresementu di 24%. Un total di 2.433 turista di estadia a keda registrá. Aruba a krese ku 23% kual ta representá un total di 1.042 arubiano. Mayoria turista for di Aruba a bishitá Kòrsou riba djaluna 8 i djamars 9 di febrüari. Esakinan ta e dianan ku mayoria a bini pa eksperensia Kòrsou su Karnaval di despedida. For di Trinidad i Tobago nos a risibí 590 turista ku ta un oumento di 49%.

Region di Sur Amérika a registrá un bahada di 17% na febrüari ku un total di 9.522 turista di estadia kompará ku 11.471 na 2015. Venezuela a konosé un bahada di 24% ku un total di 6.126 turista di estadia. Colombia a krese ku 44% na febrüari ku 980 turista. Eliminashon di visa i e esfuersonan di merkadeo ta dunando resultado. Brazil i Sürnam a konosé un bahada di respektivamente 34% i 11%. Tur dos pais ta pasando den un reseshon ekonómiko na e momentunan aki.

Sifranan promé dos lunanan di aña: kantidat di anochi, akomodashon i impakto ekonómiko
E promé dos lunanan di aña 2016 ta mustrando un kresementu leve di 1%. E kresementu aki por keda atribuí na e region di Europa, Nort Amérika i Karibe. E regionnan aki a krese ku respektivamente 11%, 9% i 5%. Region di Sur Amérika a konosé un bahada registrando 21% ménos turista den e dos promé lunanan di 2016. E kantidat di anochi ku e turistanan a keda nos pais e promé dos lunanan di 2016 ta mustra un bahada di 9%. Sifranan preliminar ta mustra un total di 671.316

anochi. Aña pasa e kantidat tabata 737.041. E region di Nort Amérika a registrá kresementu di 3%. Un total di 122.549 anochi a keda registrá. E kantidat di anochi ku e turista for di Europa a keda nos

pais a konosé un subida di 1% kual ta 404.967 den sifranan apsoluto. Sur Amérika i Karibe a registrá un bahada di respektivamente 39% i 8%.

For di e karchinan di embarkashon i desembarkashon por konstatá ku 64% (53.287 turista) di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (28%), hotèl ku ménos ku 150 kamber (12%) bùngalo (18%), i apartamentu (7%). E kantidat di turista ku a keda na un akomodashon no registrá ta 29.514. Esaki ta representá 36% di e kantidat total di turista di estadia. Akomodashonnan no registrá ta akomodashonnan ku no ta aparesé den CTB su sistema di dato.

Hasiendo uso di e modelo ‘Turistika’, CTB huntu ku MEO a kalkulá ku durante e promé dos lunanan di 2016, sektor di turismo a generá un impakto direkto di 151 mion florin pa nos ekonomia lokal. Aña pasá e montante generá tabata 145 mion florin. E tabèl ta mustra e montante generá di e dos promé lunanan di aña 2016 kompará ku e mesun periodo na aña 2015.

Fuente: Modelo ‘Turistika’ di MEO i CTB – Mion florin (x1000)

Siman Santu i pronóstiko luna di mart 2016
CTB ta raportá un kresementu preliminar di 9% den turismo di estadia durante e temporada di Siman Santu 2016. Un komparashon di Siman Santu 2016 i Siman Santu 2015 ta mustra un kresementu di sigur 978 turista adishonal. E periodo ku a keda kalkulá ta kubri un total di 8 dia kuminsando na e djaluna promé ku e dianan liber i terminando di dos dia di Pasku di Resurekshon. Aña pasa 11.020 turista di estadia a keda registrá durante e periodo menshoná, miéntras e aña aki e total ta 11.998. Despues ku prosesá e karchinan por indiká e orígen di e turistanan.

E sifranan preliminar ta mustra klaramente ku Venezuela pa luna di mart 2016 lo registrá sifranan positivo. Ta sigur ku nos lo bai konosé un kresementu di dòbel sifra pa loke ta trata e kantidat total di turista di estadia pa luna di mart 2016.

Download “Preliminary February 2016 Arrivals”.