WILLEMSTAD-11 di novèmber 2014 – Ofisina di Turismo di Kòrsou ku orguyo ta anunsiá ku Kòrsou lo ta anfitrion di Vakantiebeurs 2015. Ku e atenshon spesial aki riba Kòrsou, CTB ke probechá e okashon pa mustra biaheronan europeo dikon Kòrsou ta asina gusta i ku Kòrsou tin hopi mas di ofresé ku solamente solo, santu i laman. Tur esnan ku lo bishitá e feria di biahe lo keda impreshoná pa Kòrsou su stènt grandi i kolorido ku lo ta ubiká den e ‘Caribbean Village’. Lo hasi e máksimo esfuerso pa tur ku bishitá e stènt di Kòrsou risibí un eksperensia sin igual. Vakantiebeurs 2015 lo tuma lugá di 14 pa 18 di yanüari 2015 den Jaarsbeurs di Utrecht.
Ku partisipashon na Vakantiebeurs 2015 ta nifiká ku CTB lo habri aña nobo ku un promoshon grandi pa Kòrsou. Na komienso di aña semper tin hopi reservashon di biahe ta tuma lugá pa Kòrsou. Durante Vakantiebeurs 2015 lo pone énfasis riba e popularidat di Kòrsou komo destinashon i e kapasidat di buelo èkstra ku ta keda ofresé dor di aeroliñanan manera KLM i e Dreamliner di Arkefly.
Durante Vakantiebeurs 2015 CTB i e diferente partnernan lo amplia riba aspektonan ku ta ménos konosí di nos isla. Asina por hasi menshon ku lo dediká atenshon spesial na Kòrsou su kustumbernan kulinario kaminda lo duna tayer di kushinamentu na e stènt di Kòrsou. Kòrsou lo forma parti tambe di e ruta kulinario durante di e feria. Lo kombiná e presentashon di Kòrsou ku entretenementu, ofertanan spesial i ambiente kultural. E tema di Vakantiebeurs 2015 lo ta “Je zou zweren dat je er al was” (Lo bo por hura ku ya bo tabat’ei), bishitantenan di e feria lo haña un ñapa di tur loke e diferente destinashonnan presente tin pa ofresé. E strategia di CTB lo ta pa konvensé e turista di e produkto diversifiká ku Kòrsou ta ofresé, ku ta muchu mas ku solamente solo, santu i laman.
