WILLEMSTAD- 17 di novèmber 2015: – Despues ku e periodo di votashon pa e ‘10 Best Readers’ Choice Travel Award’ a klousura, USA Today a anunsiá e ganadornan riba su wèpsáit. Ta trata aki di e ganadornan, di e 4 kategorianan pa kual Kòrsou tambe a keda nominá esta ‘Best Caribbean Destination for food’, ‘Best Caribbean Destination for Golf’, ‘Best Caribbean Destination for Nightlife’ i ‘Best Caribbean Destination for Shopping’. Kòrsou a resultá den Tòp 5 di tur e kategorianan menshoná i a hasta finalisá den Tòp 3 di dos di e kategorianan. Tur voto ku a keda registrá den e sistema di votashon di USA Today a kontribuí na e rekonosementu ku nos isla a risibí. CTB ta hopi kontentu ku e resultadonan.
Kòrsou a keda na di 5 lugá den kategoria di ‘Best Caribbean Destination for food’, na di 3 lugá den kategoria di ‘Best Caribbean Destination for Golf’, meskos ( number 3) den kategoria di ‘Best Caribbean Destination for Nightlife’ i na di 5 lugá den kategoria di ‘Best Caribbean Destination for Shopping’. Algun di e paisnan ku tambe a resultá ganador den e diferente kategorianan ta Santo Domingo, Guadeloupe, Trinidad & Tobago, Haiti, Puerto Rico, Nevis, Antigua i Aruba. CTB ta gradisí komunidat pa nan votashon i sosten durante di henter e kampaña di USA Today. E resultadonan aki ta importante pa merkadeo di nos isla internashonalmente. Hopi turista ta konsultá un wèpsáit manera USA Today promé ku nan skohe kua pais nan ta bai ku vakashon. USA Today lo publiká e resultadonan den su korant di djabièrnè miéntras tur esnan ku ta interesá por mira e resultadonan bèk riba www.10best.com/awards/travel/. Pabien Kòrsou!
