Kòrsou ku bon presentashon durante Vakantiebeurs 2015

January 20, 2015

WILLEMSTAD- 20 di yanüari 2015 – Di 14 pa 18 di yanüari 2015 Ofisina di Turismo di Kòrsou i diferente partner den sektor privá a partisipá na Vakantiebeurs 2015 kual a tuma lugá na Jaarbeurs na Utrecht. E aña aki Kòrsou tabata anfitrion di Vakantiebeurs. Ku e atenshon spesial aki riba Kòrsou, e tim kompletu a sa di probechá di e okashon pa mustra biaheronan europeo dikon Kòrsou ta asina gusta i ku Kòrsou tin hopi mas di ofresé ku solamente solo, santu i laman. Nos por mira bèk riba un bon promoshon pa Kòrsou.

E aña aki Vakantiebeurs a konta ku partisipashon di un total di 117.063 bishitante repartí riba e 5 dianan ku e feria di biahe a tuma lugá. Kòrsou tabata prominentemente presente den e ‘Caribbean Village’ ku un stènt kolorido kaminda e bishitante e aña aki por a partisipá na diferente aktividat original manera entre otrotayér di kushinamentu i tambe na un ruta kulinario na kua Kòrsou huntu ku 6 otro destinashon a partisipá.

Ademas e bishitantenan por a saka un CuraSelfie kual ta un potrèt saka dilanti di un dekòr di Kòrsou. Un total di aproksimadamente 1.100 bishitante a partisipá na e akshon aki kaminda nan por a gana premionan atraktivo. Banda di esei a rifa tambe ticket pa 2 persona pa nan por bin bishitá nos pais. Tambe e diferente partnernan a amplia riba tur e aspektonan ku ta hasi Kòrsou un isla dushi pa bishitá. E strategia di e tim presente tabata pa konvensé e bishitante di e produkto diversifiká ku Kòrsou ta ofresé, ku ta muchu mas ku solamente solo, santu i laman.

Most recent