Kòrsou a partisipá na seshon di informashon pa agentenan di biahe na Hulanda

March 31, 2016

WILLEMSTAD – 31 di mart 2016 – Dos biaha pa aña Personal Touch Travel ta tene un dia, estilo ‘speed-dating’ kaminda ta brinda agentenan di biahe independiente un plataforma pa topa ku representantenan di vários destinashon i akomodashon durante un solo evento. Meta di evento ta pa duna e agentenan di biahe e oportunidat pa hasi preguntanan relevante ku por yuda nan bende e destinashonnan partisipante mas mihó posibel. Kòrsou tambe a partisipá na e evento aki. E aña aki e evento a tuma lugá na Carlton President Hotel, Maarssen, na Hulanda.

Kada destinashon tabatin un mesa di informashon. Durante 11 buèlta di kada unu 15 minüt e destinashon òf akomodashon mester duna mas tantu informashon posibel na e agente di biahe sinta su dilanti. E biaha aki Ofisina di Turismo di Kòrsou (CTB) huntu ku Acoya Hotel Suites & Villas a representá Kòrsou. Por a konta ku 70 agente di biahe independiente ku tabata hopi interesá den Kòrsou i entusiasmá pa risibí informashon i detayenan nobo ku nan por usa na momentu di bende Kòrsou komo destinashon faborito den Karibe. Meskos ku Kòrsou diferente otro pais i akomodashon tambe a partisipá na e evento, entre nan: Gateway, Swagatam, Visit Britain, Latin American Reflections, Travelmarketing, Air Canada i Qas Holidays.

CTB ta sigui ku su esfuersonan pa den e kaso aki ekipá agentenan di biahe ku tur informashon nesesario pa nan por yuda nan klientenan den nan eskoho pa Kòrsou. Por mira bèk riba un eksitoso partisipashon.

Most recent