Kòrsou a partisipá na workshop di Más Travel na Ecuador

January 14, 2016

WILLEMSTAD- 14 di yanüari 2016 – Dia 9 i 10 di yanüari último e mayorista Más Travel a organisá na Ecuador un workshop spesialmente pa informá su agentenan di biahe i operadornan di tour, tokante e diferente destinashonnan ku Más Travel ta promové. Ofisina di Turismo di Kòrsou (CTB) huntu ku representantenan di sektor privá tabata presente i a duna un presentashon di loke Kòrsou tin di ofresé.

E workshop a tuma lugá na hotèl Barceló Colón Miramar na Salinas, Ecuador na kua a asistí mas di 150 partisipante di diferente siudat di Ecuador manera entre otro: Guayaquil, Machala, Manta, Portoviejo i Cuenca. E partisipantenan a mustra hopi interes pa traha ku Kòrsou. Riba e biahe aki CTB a keda kompañá pa representantenan di Sunscape Curaçao Resort, Spa & Casino i tambe Fiesta Tours. Durante di e fiesta di klousura kual a keda patrosiná pa Kòrsou, nos representantenan a haña e oportunidat pa presentá Kòrsou di un manera úniko. E tim a sa di duna informashon detayá di Kòrsou su produkto turístiko i tambe kontesta kualkier inkietut di nan banda. Mas mihó informá e agentenan di biahe ta riba e produkto ku Kòrsou ta ofresé mas mihó nan por bende nos pais turístikamente.

CTB ta keda ku su esfuersonan pa sigui promové Kòrsou komo e hoya den Karibe pa asina logra trese mas turista pa nos pais.

Most recent