Kòrsou presente na ‘Boot 2016’

February 17, 2016

WILLEMSTAD- 17 di febrüari 2016– Resientemente Ofisina di Turismo di Kòrsou (CTB) huntu ku diferente partner den sektor di turismo a partisipá na e di 47 edishon di ‘International Boat Show Düsseldorf’ tambe yamá ‘Boot Düsseldorf’. E aña aki un total di 247.000 bishitante for di 52 pais a bishitá e feria durante 9 dia largu, esaki ta un kresementu di 2,8% na asistensia kompará ku 2015. Meta di Kòrsou su partisipashon tabata pa promové nos isla komo un destinashon pa buseo tambe.

E aña aki Kòrsou a partisipá pa di 6 bes na e feria ku a tuma lugá na Messe Düsseldorf. E bishitante di ‘Boot 2016’ tabatin oportunidat pa tuma informashon na e diferente stèntnan di informashon di e destinashonnan i serka e operadornan di tour di buseo. Tambe tur amante di buseo por a kumpra ekiponan di buseo i snòrkel. E tim a hasi bon uso di e oportunidat pa presentá e sitionan di buseo di mas popular riba nos isla i di posishoná Kòrsou komo un destinashon faborito pa e turista ku ta buska spesífikamente un mundu marítimo impreshonante. Sambuyadónan por eksplorá un variedat úniko di koral, diferente tipo di piska, ref, kuebanan skondí i barkunan noufragá.

Durante di ‘Boot 2016’ e tim di Kòrsou a duna un total di 4 presentashon riba e esenario prinsipal di e feria. A ekstendé tambe un invitashon pa partnernan importante pasa na e stènt di Kòrsou i disfrutá di algu di bebe, ku músika bibu i interkambiá ku otro. Tambe e bishitantenan di e stènt por a partisipá na un rifa ku a konsistí di preguntanan tokante buseo na Kòrsou i asina gana premionan atraktivo. Un danki ta bai na e partnernan di sektor privá ku a forma parti di e tim di Kòrsou kualnan ta: Bahia Apartments, Blue Bay Resort Curaçao, Rancho el Sobrino, All West Apartments, Ocean Encounters, Lions Dive & Beach Resort, Dive´n Curaçao, GO West Diving, Sun Reef Village, Curaçao Divers i tambe Lagun Blou Resort. Tambe Sunscape Curaçao Resort, Spa & Casino i Acoya Hotel Suites & Villas ku a kontribuí ku foyeto di nan respektivo propiedat.

Most recent