Kòrsou presente na e di 3 edishon di ‘Encuentro de Líderes para Líderes’ na Colombia

October 12, 2015

E enkuentro a konta ku partisipashon di 320 empresario di Colombia…
WILLEMSTAD- 12 di òktober 2015 – Resientemente Ofisina di Turismo di Kòrsou (CTB) huntu ku Kamara di Komersio i CINEX a partisipá na e di tres edishon di e ‘Encuentro de Líderes para Líderes’ organisá pa ‘Foro de Presidentes’. E enkuentro a konta ku partisipashon di mas di 300 empresario di organisashonnan importante di diferente sektor empresarial. Kòrsou su partisipashon tabata ku e meta pa invitá e empresarionan for di Colombia pa e promé edishon di ‘Encuentro de Empresarios Colombianos’ kual ta programá pa tuma lugá na Kòrsou fin di òktober 2015.

E presentenan tabatin oportunidat pa skucha e eksperensianan di liderazgo i transformashon empresarial ku a keda presentá pa un pènel di ekspertonan di nivel haltu. E pènel a konsistí di entre otro sr. José Alberto Vélez, presidente di Grupo Argos, sr. Luis Carlos Botero, presidente di Team Foods, sr. Carlos Enrique Cavelier, presidente di Alquería i Fernando Rodés, vise presidente i sosio di e Grupo Havas.

E invitadonan tabatin e oportunidat pa eksponé nan eksperensianan riba nivel di gerensia kual a permití nan implementá akshonnan di kambio pa asina logra kresementu di nan negoshi.

Sr. Hugo Clarinda, direktor interino di CTB i sr. Víctor Manuel Dapena, representante di CTB na Colombia, a afirmá ku e partisipashon di Kòrsou na e tipo di inisiativanan aki ta kontribuí pa posishoná nos isla komo e destinashon ku ta ofresé ademas di oportunidat pa relahá, kultura i entretenementu tambe e esenario ideal pa invershonistanan Kolombiano mira den Kòrsou e oportunidat pa invertí i desaroyá relashonnan di negoshi ku Kòrsou, Karibe i alabes fungi komo un brùg pa relashonnan di negoshi ku Union Oropeo.

Most recent