…E feria di konsumidó di mas grandi na Hulanda…
WILLEMSTAD- 25 di yanüari 2019 – Meskos ku añanan anterior Ofisina di Turismo di Kòrsou (CTB) kompañá pa diferente partner den sektor privá a partisipá na Vakantiebeurs 2019. E feria a tuma lugá di 9 pa 13 di yanüari último na Jaarbeurs Utrecht, Hulanda. Vakantiebeurs ta e feria di mas grandi pa e biahero hulandes. E aña aki, por a konta ku mas di 104.000 bishitante ku a resultá un plataforma perfekto pa un bes mas promové nos pais komo é destinashon turístiko number unu den Karibe. Otro aña 2020, Vakantiebeurs lo selebrá su di 50 edishon.
Ta konosí ku 64% di e bishitantenan di Vakantiebeurs tin komo meta pa tuma mas tantu informashon posibel den preparashon pa nan próksimo fakansi i 63% ta kurioso pa deskubrí un destinashon nobo. Esaki ta ofresé un oportunidat úniko pa presentá Kòrsou komo e destinashon number unu den Karibe. Tur aña di nobo CTB ta organisá un aktividat spesialmente pa atraé mas bishitante na e stènt di Kòrsou. E aña aki esnan ku a bishitá e feria por a saka un pòtrèt na e stènt di CTB. Bishitantenan por a skohe un background ku ta forma parti di e kampaña nobo di promoshon di Kòrsou esta ‘Feel it For Yourself’. Por a saka un potrèt bailando den un grupo di karnaval, pará riba brùg Emma, na un di Kòrsou su playanan òf bou di awa. Unabes ku nan a registrá ku nan e-mail adrès nan tabata risibí e potrèt mesora pa bai kas kuné. E aktividat di saka potrèt a resultá masha popular i a atraé aproksimadamente 800 persona adishonal na e stènt di Kòrsou. Ademas di esaki, CTB a organisá un evento kombiná ku kòktel spesialmente pa su partnernan pa huntu selebrá e komienso di un aña nobo. E evento aki a tuma lugá riba e promé dia di e feria.
CTB ta gradisí partnernan di sektor privá ku a forma parti di e tim di Kòrsou; Papagayo Curaçao, Livingstone Jan Thiel Resort, Acoya Curaçao Resorts Villas & Spa, Kontiki Beach Resort Curaçao, Oasis Coral Estate Beach Dive & Wellness Resort, Dolphin Suites, Scuba Lodge & Ocean Suites, Dolphin Academy Curaçao, Hilton Curaçao, BlueFinn Charters Curaçao, Curaçao Activities i Pietermaai Boutique Hotel.
