WILLEMSTAD- 26 di sèptèmber 2017 – Kòrsou ta Dushi. bib’é. stim’é. esaki ta nòmber di e kampaña di konsientisashon nobo ku Ofisina di Turismo di Kòrsou (CTB) a lansa dia 24 di sèptèmber último. Meta di e kampaña ta pa konsientisá habitantenan di Kòrsou riba e privilegio di ta biba na Kòrsou i di ta forma parti di e komunidat di Kòrsou. E kampaña ta dirigí riba nos komunidat kompletu. E kampaña ta stimulá pa hasi nos mas orguyoso di nos kultura, naturalesa i historia. Minister enkargá ku Desaroyo Ekonómiko, Dr. Steven Martina a duna insiso na e kampaña inspirativo ‘Kòrsou ta dushi. Bib’é. Stim’é’.
Hopi bes nos no ta paga tinu kuantu Kòrsou tin di ofresé pa nos mes ku ta biba akinan. Kuantu biaha nos ta bai bishitá nos atrakshonnan turístiko i sera konosí di aserka ku loke nos pais tin di brinda? Kuantu di nos sa kuantu laman Kòrsou tin? Ku e kampaña aki kier bai rekordá i reeduká nos komunidat di tur lokual nos pais tin di ofresé. Enfoke di e kampaña ta: konosé, kuida i pone atenshon na nos mes, nos bisindario i nos pais, nos dushi Kòrsou.
E kampaña ta konsistí di diferente elemento kaminda ta hasi uso di un famia pa por ilustrá e outentisidat di nos pueblo. E mensahenan ku ta forma parti di e kampaña tur ta ku e meta pa inspirá nos pa ta un mihó hende i pa stima nos pais. Demostrá amor na otro, inspirá lidernan pa futuro, stima bo bario, konservashon di nos herensia kultural i rèspèt pa nos bandera ta algun di e mensahenan. Komo parti di e kampaña lo bai duna tambe plakat di rekonosementu na personanan ku a ekselá riba nan aria. Na apertura di e kampaña a duna rekonosementu na sra. Filomena ‘Elia’ Isenia i Dr. Dino Daal. Sra. Filomena ‘Elia’ Isenia tin 40 aña edukando nos pueblo di e balor di nos herensia kultural. Dr. Daal tin 26 aña laborando na CTB. Riba 6 di aprel 2017, Dr. Daal a defendé su tésis ku título: “Impakto di Turismo riba kalidat di bida di habitante” i a gradua komo “Doctor in Business Administration”.
Pa mas informashon di e kampaña bishitá e wèpsait www.korsoutadushi.com òf facebook.com/korsoutadushi.
