WILLEMSTAD – 15 di novèmber 2019 – Ofisina di Turismo di Kòrsou (CTB) i Universal Music a hasi un presentashon sumamente eksitoso na e medionan di komunikashon i partnernan stratégiko den turismo den kuadro di lansamentu ofisial di Voy Por Ti, e single nobo di Cali y El Dandee den kolaborashon ku Piso 21.
E vidio kolorido akí, filmá na Kòrsou i dirigí pa Nuno Gomes, ta resaltá tur e aspektonan mas atraktivo di nos isla, inkluso un di su playanan. E kurasonnan i notanan musikal animá ku bo por mira den e vidio ta dun’é un toke mágiko i imaginario. E letra kasi poétiko ta zona na un ritmo di drùm i bass. Ritmo, kurason, pashon i sintimentu ta bini huntu den e single nobo akí, Voy Por Ti, presentá pa e duo dinámiko di Cali y El Dandee, ku e biaha akí a uni talento ku e grupo di pòp latino Piso 21, tambe di Colombia.
Industria musikal ta sigui mustra un fasinashon ku nos bunita isla, danki na su gran potensial komo esenario pa diferente artista di renombre internashonal ku ta mira den dje e esenario perfekto pa mustra nan fanatikada kon músika, playa, arkitektura, arte, relahamentu, dibershon i un sinfin di aktividat por bini huntu den un meskla perfekto.
E evento a konta ku presensia di e medionan di komunikashon prinsipal, partner stratégiko di turismo di tantu Kòrsou komo Colombia i representante di industria musikal. Tur presente a disfrutá di un anochi berdaderamente mágiko. Voy Por Ti ya a alkansá 4 mion view. Pa wak e clip, bai riba CTB su Página di Facebook korporativo kual ta Curacao Tourist Board òf buska Voy Por Ti riba YouTube.
