Kresementu eksepshonal di turismo na mart 2019

...15% kresementu den turismo di estadia...
WILLEMSTAD – 25 di aprel 2019 – Ofisina di Turismo di Kòrsou (CTB) ta raportá otro luna mas di kresementu di dòbel sifra den kantidat di turista di estadia. E sifranan mas resien ta mustra un kresementu di 15% den turismo di estadia na luna di mart 2019. A registrá 5.503 turista mas durante e di tres luna di 2019 hibando e total na 41.861 turista di estadia kompará ku 36.358 na mart 2018.

Hulanda a registrá 17% mas turista di estadia na mart. Total 16.153 turista di estadia a keda risibí for di e pais ku mas ta produsí pa Kòrsou. Mientrastantu Europa kompletu a krese ku 9% produsiendo 21.066 turista na mart.

Lansamentu di e kampaña di branding nobo huntu ku e sosten kontinuo di nos partnernan ta kosechando su frutanan pa nos isla den forma di kresementu di turismo di estadia. E kresementu aki ta partikularmente visibel na e sifranan registrá for di Nort Amérika; e region aki ta representá 30% di e total di turista ku a bishitá nos pais na mart. Un total di 12.446 turista di estadia a keda risibí na luna di mart. Estádos Unídos a krese ku 31% miéntras Canada a registrá 23% mas turista di estadia. Tantu Canada komo Estádos Unídos ta benefisiá di airlift adishonal e temporada di wenter aki kual sigur a yuda pa Kòrsou registrá e kresementu impreshonante aki.

Turismo di estadia for di Sur Amérika a presta bon registrando 10% kresementu. Den sifranan apsoluto un total di 4.672 turista di estadia a keda risibí na mart 2019 for di Sur Amérika. Colombia a registrá 1.613 turista di estadia kual ta un kresementu di 15%. Na mes momentu turismo di estadia for di Brazil a krese ku 83% registrando 1.292 turista brasilero. Mayoria Brasilero a biaha pa Kòrsou den e promé siman di luna di mart. Brasileronan gusta biaha durante e wikènt di Karnaval.

E kantidat total di anochi pa turista a krese ku 6% na mart 2019. Total 357 mil anochi a keda registrá. Turistanan for di Europa a keda 224 mil anochi na Kòrsou kual ta un kresementu di 4%. Turistanan prosedente di Nort Amérika i Sur Amérika a keda un kantidat di respektivamente 84 mil i 32 mil anochi durante luna di mart.

 
By browsing curacao.com, you accept the use of profiling cookies either ours or third-party ones. More information about cookies and privacy policy.