…E orado durante di e almuerso tabata sr. Hensley Meulens…
WILLEMSTAD- 1 di febrüari 2017 – Riba inisiativa di Minister di Desaroyo Ekonómiko, sr. Eugene Rhuggenaath, Ofisina di Turismo di Kòrsou (CTB) a organisá un almuerso pa representantenan di instansianan di Gobièrnu, kompanianan priva i di sektor di turismo ku e tema: ‘How to maximize Curaçao’s exposure through our Major League Baseball Ambassadors’. E inisiativa aki ta siguiendo un di e rekomendashonnan di e Plan Maestro di Turismo 2015-2020 pa krea mas konosementu di Kòrsou den eksterior i sigur na Merka. E orado durante di e almuerso tabata sr. Hensley Meulens. Minister Rhuggenaath den su introdukshon a indiká ku e meta di e almuerso ta pa inspirá esnan presente i tambe duna un sentido di direkshon ora nos ta papia di nos peloteronan komo embahadornan pa Kòrsou. sr. Meulens a keda kompañá pa peloteronan profeshonal; Didi Gregorius, Jonathan Schoop i Jurickson Profar.
CTB a yega di hasi diferente kampaña di promoshon ku atletanan yu di Kòrsou ku ta prestando riba nivel haltu den eksterior, ehèmpel mas resien di esaki ta e akuerdo ku CTB a sera ku Churandy Martina kaminda ta usa e atleta komo un embahador pa nos pais. Durante di su presentashon sr. Hensley Meulens a lansa e pregunta; si nos mester hasi uso di nos peloteronan ku ta hunga den baseball liga grandi pa promové Kòrsou. Tur esnan ku tabata presente ta di akuerdo ku e kontesta riba e pregunta aki ta Si!. Sr. Meulens a duna diferente ehèmpel kon atletanan internashonal ta hasi merkadeo a base di nan ‘branding’ personal. Kòrsou tin hopi yu di Kòrsou ku ta profilá riba nivel haltu den baseball liga grandi i awor mas ku nunka ta e oportunidat ideal pa saka lo máksimo pa promoshoná nos isla via nos embahadornan. Algun di nos peloteronan profeshonal ta: Andrelton Simmons di Los Angeles Angels, Didi Gregorius di New York Yankees, Kenley Jansen di Los Angeles Dodgers, Jurickson Profar di Texas Rangers, Jonathan Schoop di Baltimore Oreoles i Hensley Meulens di San Francisco Giants. Na final di e almuerso sr. Hugo Clarinda (CTB) a splika ku e siguiente paso lo ta ku CTB lo bai sinta individualmente ku esnan ku tabata presente pa asina por yega na ideanan konkreto kon pa usa nos peloteronan profeshonal komo parti importante den e plan di promoshon pa nos pais.
