Ofisina di Turismo di Kòrsou Ta Lansa Kampaña Nobo di Branding Internashonal

September 28, 2018

‘Sintié pa Bo Mes’…
WILLEMSTAD –27 di sèptèmber 2018 – E luna akí, Ofisina di Turismo di Kòrsou (CTB) lo lansa su kampaña nobo di branding internashonal ku e slogan, ‘Sintié pa Bo Mes.’ E kampaña ta hala atenshon na nos isla su historia riku, su outentisidat i e variedat úniko di sitio i aktividat ku ta duna kada bishitante e libertat pa eksplorá Kòrsou manera e ta deseá. E avisonan nobo ta sumamente yamativo, inspirá pa Kòrsou su estétika vibrante. E idea ta di suprayá ku Kòrsou no ta manera e otro islanan di region, i asina hala atenshon riba Kòrsou.

Kòrsou su esfera outéntiko, su arkitektura ku influensia europeo i su playanan íntimo ta atraé un gran variedat di biahero, sea ku nan ta di e tipo mas aventurero, esun ku ta bin pa disfrutána playa òf e afisionado di historia. ‘Curaçao. Feel It For Yourself,’ (Kòrsou, sintié pa bo mes) e slogan original ku CTB a traha riba dje durante e último dos añanan, ta karga e idiologia akí i ta animá biaheronan di tur orígen, rasa i seksualidat pa eksperensiá Kòrsou manera nan ta deseá.

Pa desaroyá un kampaña internashonal di branding spesífiko, CTB i Catch New York, ku ta CTB su empresa publisitario basá na New York, a hasi estudio ekstenso di merkado ku grupo di enfoke, entrevista ku eksperto i enkuesta kualitativo direkto ku konsumidó rònt mundu. Tur region a keda inkluí. E tim a biaha bai Alemania, Hulanda, Canada, Brazil i Colombia i a papia ku spesialista di industria di aerolínea, tour operator, manager di e diferente regionnan, representante di hotèl i hende komun. Ora a analisá e kontestanan i visualisá esakinan riba un gráfiko ku ta mustra kon e diferente temanan di biahe karibense ta keda persibí, e idea di ‘sinti bo liber’ ta unu ku tabata fuerte den tur e merkadonan analisá.

Kòrsou ta konsistí di un fushon di 55 diferente nashonalidat i hendenan lokal ku ta papia kuater idioma. Un i tur ta bon biní i esei a pone nos isla chikitu riba mapa, komo un di e destinashonnan den Karibe kaminda tur hende ta sinti nan aseptá, partikularmente turistanan LGBT.

E tema di sinti bo liber – liber di tur preokupashon i tambe di prehuisio – a duna lus na e slogan ‘Feel It For Yourself’, ‘Sintié pa Bo Mes’. Komo ku tin diferente manera pa eksperensiá Kòrsou, kada turista por namorá di e isla i di e esfera outéntiko i inolvidabel na nan manera.

Pa ta diferente for di e material kasi idéntiko ku konsumidónan a kustumbrá di mira di e otro destinashonnan den Karibe, kaminda semper ta koló blou ta dominá, CTB a lansa un serie di imágen vibrante ku ta asta mas kolorido ku e edifisionan den sentro di siudat. Riba un di e avisonan tin e slogan ‘Feel It For Yourself’ (‘Sintié pa bo mes’) i riba un otro ‘Feel It In Your Soul’ (‘Sintié te den bo alma’).

‘Por fin a yega ora pa revelá e kampaña di branding nobo, un kampaña ku ta un refleho perfekto di Kòrsou su zjeitu i outentisidat,’ segun Hugo Clarinda, Direktor Interino di CTB. ‘E imágennan ta transmití e energia vibrante di Kòrsou i e slogan ta ilustrá ku Kòrsou ta un nashon pa un i tur.’

E kampaña nobo di branding internashonal lo keda lansá na Hulanda, Alemania, Bélgika, Colombia, Brazil, Venezuela, Ecuador, Karibe, Canada, Estados Unidos partikularmente na New York, Miami, Charlotte i den e merkadonan ku konekshon aéreo direkto.

Most recent