Operashon Siman Santu 2019

April 11, 2019

di 18 pa 23 di aprel…
WILLEMSTAD – 10 di aprel 2019 –Ofisina di Turismo di Kòrsou (CTB) huntu ku diferente entidat públiko i privá a uni forsa un biaha mas pa ehekutá Operashon Siman Santu. E aña aki Operashon Siman Santu ta tuma lugá di 18 pa 23 di aprel 2019. Meta di Operashon Siman Santu ta pa optimalisá seguridat i limpiesa durante di e temporada di Siman Santu. Esaki ta na benefisio di tantu e turistanan ku ta di bishita riba nos pais i tambe nos pueblo lokal. E tim enkargá ku e operashon ta konsistí di representantenan di: Kuerpo Polisial Kòrsou, Selikor, Warda Kosta, Citro, Ambulans, Rode Kruis, Stichting Slachtofferhulp Curaçao, Janthiel Security, Hawk Eye Security i CTB.

CTB a informá ku den kuadro di Operashon Siman Santu meskos ku tabata e kaso añanan anterior huntu ku demas stakeholders a apuntá algun playa públiko i atrakshon turístiko na unda lo bai optimalisá seguridat, servisio di limpiesa i di tualèt portátil. Durante e wikènt tras di lomba e tim a bishitá e diferente arianan komo preparashon pa Operashon Siman Santu ku ta inisiá dia 18 di aprel awor.

Pa e parti di Kuerpo Polisial a informá ku lo bai tin dos punto prinsipal di sosten kual ta e pòst na Montaña i esun na Barber. E otro pòstnan tambe lo yuda kubri e arianan turístiko. Mas aleu Kuerpo Polisial a informá ku e siguiente medidanan di prevenshon ta vigente: Shofùrnan mester sòru pa tur dokumentu di nan vehíkulo ta na òrdu i e vehíkulo mes mester ta den un bon estado tékniko; lo tin sufisiente unidat tantu uniformá komo na sivil ku lo kontrolá na e diferente playanan pero tambe otro sitionan turístiko; un petishon pa no laga kosnan di balor den outo atras; stashoná vehíkulo na sitionan ku tin sufisiente iluminashon; sigurá bo mes ku bo vehíkulo ta di lòk i ku tur e glasnan ta será promé ku bandoná e vehíkulo. Polis lo traha den estrecho koperashon ku kompanianan di seguridat na playanan i tambe otro instansianan ku ta duna yudansa di emergensia pa garantisá un yudansa profeshonal rápido i efektivo. Lo bai tin kòntròl di tráfiko na diferente sitio. E Departamentu di pèrmit di Polis lo kontrolá tambe establesimentunan pa chèk si tur pèrmit ta na òrdu. Brantwer i Stichting Slachtofferhulp Curaçao lo ta disponibel pa den kaso ku esaki ta nesesario. Ta bon pa anunsiá tambe ku den kaso ku e aria di Caracasbaai tin hopi vehíkulo i ta opstakulisá e tráfiko motorisá, polis por tuma medidanan nesesario pa garantisá e fluho rápido di tráfiko. Pa kasonan no urgente por yama 917 i den kaso di urgensia por yama e number 911.

Warda Kosta lo tene kòntròl riba botonan pa chèk si tur dokumentonan i rekisitonan di seguridat ta abordo i na òrdu: entre otro vèst, flair i aparato pa paga kandela. Lo tin kòntròlnan riba komportashon di botonan i tambe sea-doo sigur kaminda hende ta landa. Tambe lo kontrolá riba uso di alkohòl. Ademas Warda Kosta konhuntamente ku CITRO lo atendé kasonan di reskate riba laman. Den kaso di emergensia por yama 913. Puntonan importante: tene kuenta ku kantidat di pasahero ku ta permití den e boto, mester tin aparatonan pa komuniká abordo; Radio VHF, telefòn selular ku bateria kargá i tambe flairnan pa por indiká bo posishon den kaso di búskeda.

Pa loke ta trata e parti di limpiesa Selikor a anunsiá ku lo amplia e skema di rekohé shushi na e diferente playanan. Na e playanan kaminda tin tualèt portátil e personal di Selikor lo sòru pa limpia i desinfektá esakinan ku regularidat. Ta hasi un petishon na esnan ku ta kedando na un wikènthùis durante di Siman Santu pa no bai benta nan sakunan di shushi den e kònteinernan ku tin ubiká na e playanan mirando ku e dianan ei lo tin hopi usuario na playanan. Konsekuentemente e kònteinernan lo no bai ta sufisiente. Konforme e skema normal Selikor lo pasa rekohé e shushinan di wikènthùis riba djaluna i spesialmente pa e temporada di Siman Santu a pone un dia èkstra kual lo ta riba e djasabra. Por depositá shushi tambe na Landfill Malpais. Number di pikèt pa Selikor lo ta: 566-1635.

Ban disfrutá huntu di un Siman Santu trankil tantu pa nos mes komo nos bishitantenan for di eksterior. Kòrsou ta Dushi, bib’é, stim’e.

Most recent