Ougùstùs, otro luna di kresementu pa turismo

...5% kresementu den turismo di estadia...
WILLEMSTAD – 26 di sèptèmber 2019 – Ofisina di Turismo di Kòrsou (CTB) ta raportá 5% kresementu den kantidat di turista di estadia pa luna di ougùstùs 2019. Un kantidat adishonal di 1.834 turista a keda risibí na luna di ougùstùs 2019, hibando e total na 38.928 turista. Un total di 313.930 turista di estadia a keda registrá te ku luna di ougùstùs 2019, esaki ta 13% kresementu kompará ku aña pasá.

E region for di kual nos ta risibí mayoria turista di estadia kual ta Europa, a krese ku 11% na ougùstùs. For di region Karibe un kresementu di 42% a keda registrá na luna di ougùstùs. E merkado di Nort Amérika a registrá un bahada di 8%, mientras Sur Amérika a baha ku 15% primordialmente dor ku e frontera ku Venezuela ta será aktualmente mientras aña pasá na e mésun temporada aki e tabata habrí. No opstante e bahada den Nort i Sur Amérika, tòg a registrá un kresementu den luna di ougùstùsmirando e diversidat di merkadonan for di kua nos ta risibí nos turistanan. E kresementu signifikante for di Karibe por keda atribuí direktamente na e Curaçao North Sea Jazz Festival i naturalmente tambe na e buelo di 2 biaha pa siman for di Port of Spain ku Caribbean Airlines. Turismo di estadia for di Trinidad & Tobago a krese ku 237% na luna di ougùstùs.

E kantidat total di anochi pa turista a krese ku 1% na ougùstùs2019. Total 326 mil anochi a keda registrá. Turistanan for di Europa a keda 210 mil anochi na Kòrsou kual ta un kresementu di 6% den kantidat di anochi pa turista. Turistanan prosedente di Nort Amérika i di Sur Amérika a keda respektivamente un kantidat di 44 i 43 mil anochi durante luna di ougùstùs. Turistanan prosedente di region Karibe a keda un total di 26 mil anochi na Kòrsou.

Prestashon hotèlnan - CHATA
Sifranan preliminar di ougùstùs 2019 ta indiká ku Kòrsou a registrá un okupashon di hotèl di 75.7%. Kompará ku e mésun luna di e aña anterior (72.7%) esaki ta un oumento di 3 punto di porsentahe. E tarifa promedio diario (ADR) a subi ku 0.4% kompará ku 2018, di $150.46 pa $151.01.

Pa loke ta trata e entrada pa kamber disponibel (RevPAR), sifranan ta indiká un oumento tambe di 4.5%. E entrada pa kamber disponibel na ougùstùs 2018 tabata $109.36 i na ougùstùs 2019 el a subi na $114.30.

Turismo krusero - CPA
Na luna di ougùstùs 2019 un total di 13 barku krusero a keda risibí, kual ta 2 barku ménos kompará ku ougùstùs 2018 resultando den un bahada den kantidat di turista krusero. Un total di 34.531 turista krusero a keda risibí kompará ku 41.542 e mésun temporada na aña pasá. Esaki ta un bahada di 17%.

Turismo di estadia yanüari te ku yüli 2019
Di yanüari pa ougùstùs, turismo di estadia a krese ku 13%. Den sifranan apsoluto ta trata di un total di 313 mil turista di estadia.

Di yanüari pa ougùstùs, turismo krusero a krese ku 4%. Den sifranan apsoluto ta trata di un total di 503 mil turista krusero.

Di yanüari pa ougùstùs, e kantidat total di turista ku a bishitá nos país a krese ku 7%, den sifranan apsoluto ta trata di 829 mil turista.

Download e sifranan.

 
By browsing curacao.com, you accept the use of profiling cookies either ours or third-party ones. More information about cookies and privacy policy.