…Na Hulanda…
WILLEMSTAD – 9 di òktober 2018 – Resientemente Ofisina di Turismo di Kòrsou (CTB) huntu ku partnernan den sektor privá a konkluí otro eksitoso roadshow na Hulanda. Kòrsou ta e destinashon den Karibe di mas popular bou di biaheronan hulandes. Pa e motibu aki CTB a organisá un roadshow na Hulanda pa duna partnernan hotelero for di Kòrsou e oportunidat pa informá agentenan di biahe tokante di tur loke Kòrsou tin di ofresé komo destinashon turístiko.
Durante 3 dia a duna informashon aktual di nos destinashon na agentenan di biahe. E promé dia di e roadshow a tuma lugá na e TUI Call Center na Enschede i e Corendon Call Center na Haarlem ku partisipashon di 60 agente di biahe. Su siguiente dia a sigui ku un seshon na Breda, kaminda a topa ku 30 agente di biahe. Riba e delaster dia a topa ku 25 agente di biahe na Hoofddorp i 40 na Kas di Kòrsou na Den Haag. E 3 dianan di informashon a konsistí di 2 parti; mainta a organisá diferente seminario pa asina e representantenan hotelero por a haña informashon aktual di e merkado hulandes spesífikamente riba e aria di komersio, trends, merkadeo i relashon públiko. Parti mèrdia a inisiá kada seshon ku un presentashon di Kòrsou i un diálogo kaminda e tim di CTB a elaborá riba e mihó eksperensianan ku nan tin di Kòrsou. E hotèlnan i agentenan di biahe presente a konta di Kòrsou for di nan punto di bista. Despues e agentenan di biahe por a partisipá den un seshon interaktivo yama ‘Dushi SUP Yoga’ siguí pa un seshon di speed dating kaminda tur partner tabatin e oportunidat di presentá nan akomodashon, aktividat- i paketenan. Na final tur agente di biahe a risibí un tas ku material informativo i un opsekio eksklusivo di Kòrsou.
Riba e delaster dia durante e evento na Kas di Kòrsou serka Minister Plenipotensiario, sr. Anthony Begina i su tim, CTB a tene un enkuentro pa gradisí representantenan di aerolínea, komersio i medionan di komunikashon pa nan trabou i dedikashon na Kòrsou komo destinashon. Tur a risibí un opsekio komo gratitut. E anochi a keda asentuá ku platonan lokal presentá dor di e Chef yu di Kòrsou, Justin Niessen partisipante di Master Chef Holland i doño di su propio restorant na Hulanda. Tambe esnan presente por a disfrutá di un presentashon di Juni Juliet i guest star Lou Prince.
CTB ta gradisí; Papagayo Beach Resort, Santa Barbara Beach & Golf Resort Curaçao, Hilton Curaçao, Acoya Curaçao Resort Villas & Spa, Sunscape Curaçao Resort Spa & Casino, Renaissance Curaçao Resort & Casino, Lions Dive and Beach Resort, Avila Beach Hotel, Morena Resort, Amalia Boutique Hotel, Kura Hulanda Village & Spa i Oasis Parcs Coral Estate pa nan partisipashon. Por mira bèk riba un eksitoso roadshow na Hulanda.
