Selebrando 30 aña di servisio di Ofisina di Turismo di Kòrsou

WILLEMSTAD – 30 di sèptèmber 2019 – Riba promé di òktober 2019, Ofisina di Turismo di Kòrsou (CTB) ta selebrá 30 aña di servisio. CTB su mishon ta pa promové Kòrsou komo un destinashon ideal pa plaser i pa hasi negoshi, segurando di e manera ei benefisio sostenibel pa nos pais. CTB su focus tur dia di nobo ta pa huntu ku partnernan lokal i tambe esnan internashonal oumentá presensia di Kòrsou den tur merkado importante, esnan nobo i tambe merkadonan ku lo por surgi.

Un bista riba pasado
Na 1915 a funda Curaçao Association ku tabata enkargá ku promoshon di Kòrsou. Despues di algun aña a pasa e responsabilidat aki pa Kámara di Komersio i Industria. For di 1945 te 1948 a apuntá un representante na New York ku tabata raportá na Kámara di Komersio i Industria riba desaroyonan turístiko di Kòrsou den eksterior. Na momentu ku Gobièrnu di Kòrsou a tuma e tarea di promoshon turístiko for di Kámara di Komersio i Industria a lanta Curaçao Tourism Commission (CTC). Na aña 1955 Curaçao Tourist Bureau a remplasá CTC. Curaçao Tourist Bureau a habri un ofisina na Caracas, Venezuela na 1982 i na Rotterdam, Hulanda na aña 1984. Na 1989 a funda Curaçao Tourism Development Foundation (CTDF). Na 2003 CTDF a kuminsá usa e nòmber Curaçao Tourist Board (CTB). Awendia banda di e ofisina na Kòrsou, CTB tin tambe ofisina na Merka i Hulanda i representante na Colombia, Brazil i Alemania.

Plannan pa Futuro
Kòrsou tin hopi atributo atraktivo inkluyendo nos playanan, kultura riku i nos hendenan amabel ku ta hasi posibel pa nos ofresé un produkto variá i interesante na nos bishitantenan. Komo e lider den turismo na Kòrsou, CTB lo kontinuá ku bista fihá riba futuro, aplikando ideanan inovativo i analisando kada oportunidat ku presentá na benefisio di nos dushi pais Kòrsou. CTB ta gradisí tur partner den turismo i komunidat kompletu pa nan aporte duná durante e añanan tras di lomba. Ban sigui traha huntu pa logra kresementu sostenibel pa nos pais.

 
By browsing curacao.com, you accept the use of profiling cookies either ours or third-party ones. More information about cookies and privacy policy.