WILLEMSTAD- 14 di yüli 2014:- Durante di un seremonia festivo Ofisina di Turismo di Kòrsou (CTB) a honra 14 establesimentu ku a pasa e programa di sertifikashon di operador di Dive i restorant ku éksito. Ta trata aki di 12 operador di Dive i 2 restorant. Den kaso di operadornan di dive esaki ta e di tres biaha ku ta kondusí e programa miéntras ku pa restorant ta e di dos biaha. Meta di e programa ta pa perkurá ku establesimentunan den turismo ta funshoná konsistentemente riba e nivel ku e bishitante ta spera di nos destinashon, di manera ku e eksperiensha riba nos isla ta satisfaktorio . E establesimentunan ku a keda sertifiká a risibí un plakat na man di Minister di Desaroyo Ekonómiko, sr. Stanley Palm.
Na e momentunan aki tin tres tipo di establesimentu ku ta haña atenshon bou di e programa di sertifikashon, ta trata di operador di dive, restorant i apartamentu. Pa e programa di sertifikashon di operador di Dive i restorant, CTB tin un akuerdo ku Innovatie Centrum Curaҫao (ICC) ku ta esun ku ta hasi e kòntròl na e establesimentunan. ICC ta keda asesorá pa un tim di eksperto riba diferente tereno i sigun e nesesidatnan di e programa, manera den kaso di sertifikashon di operador di Dive por referí na e sistema di PADI. E programa ta enserá ku ta bishita e establesimentunan ku a indiká ku nan ke partisipá i ta kontrolá si nan ta kumpli ku kriterionan di primariamente seguridat i servisio.
Un di e bentahanan di e programa pa e establesimentu ku partisipá ta ku nan ta haña un reportahe di e puntonan ku mester di mas atenshon pa asina nan por hasi ahustenan nesesario pa halsa e nivel di servisio. E establesimentu ku pasa e programa ku éksito ta risibí un plakat ku e logo di e programa i ta haña un karta ofisial di CTB ku ta indiká ku nan a kumpli ku e kriterionan stipulá. Ademas e establesimentu sertifiká por usa e logo den nan propio merkadeo i promoshon.
E programa ta keda aktivo; tin diferente establesimentu ku ta pendiente pa kumpli ku e kriterionan stipulá. E ekspektativa ta ku próksimamente mas establesimentu lo keda sertifiká. E establesimentunan ku a keda sertifiká e biaha aki ta: Bahia Apartments & Diving, Dutch Caribbean Sea Sports Hilton, Dutch Caribbean Sea Sports Marriott, Go West Diving, Ocean Encounters Sunscape, Ocean Encounters Lions Dive, Ocean Encounters Sta. Barbara, Relaxed Guided Dives B.V., Scuba Do N.V., The Dive Bus, Trunkdivers N.V., Duikcentrum Van de Ven, Sambal i Omundo Restaurant, kaminda e seremonia di sertifikashon a tuma lugá. Ta e intenshon pa sigui amplia e programa ku otro tipo di establesimentu. CTB ta felisitá tur organisashon ku aktualmente ta sertifiká bou di e programa ku e logra aki i ta yama danki na tur esnan ku ta kontribuí na éksito di e programa.
