WILLEMSTAD- 1 di yüli 2015 – Resientemente Ofisina di Turismo di Kòrsou (CTB) a organisá un Tourism Master Plan Summit ku a kubri dos dia di presentashon riba e plan maestro di turismo. E presentashonnan a keda guiá pa e tim di University of Central Florida (UCF). E summit a konta ku partisipashon di representantenan di diferente sektor den nos komunidat.
E promé dia dr. Croes a duna un bista kompletu di e Tourism Master Plan ku lo kubri e periodo di 2015 pa 2020. Dr. Croes a splika e importansia di e método di investigashon ku a keda apliká den konstrukshon di e plan pa sigurá ku e vishon presentá pa desaroyo di turismo di Kòrsou ta keda karga pa tur stakeholder. Tambe a duna splikashon di e struktura di e plan pa loke ta trata un vishon, mishon i metanan pa desaroyo di turismo di Kòrsou. A para ketu tambe na e faktornan importante ku lo ta klave den Kòrsou su potensial kresementu den Karibe. A duna un bista di e impakto di turismo riba Kòrsou su metanan riba nivel makro ekonómiko, sosial i kultural.
Riba e di dos dia a enfoká riba e persepshon di e turista ku ta bishita Kòrsou. A duna informashon di investigashonnan hasí riba e kalidat di Kòrsou su produkto turístiko salí for di punto di bista di e turistanan ku aktualmente ta bishitá nos pais i tambe potensial turistanan. Tambe a para ketu riba e kantidat, kalidat i e meskla ku ta keda sugerí pa nos produkto turístiko basá riba e segmento di merkado ku ta keda rekomendá. E delaster dia a inkluí tambe dos seshon di diskushon riba e aspekto di desaroyo di e kapital humano na Kòrsou i turismo krusero i restourashon di e aria di Sentro di Suidat. A finalisá e dia ku un pènel konsistiendo di sr. Frans Heiligers (eksperto den e aria di komunikashon), sra. Deva-Dee Silee (entrepreneur i aktivista sosial) i sr. Eldrion Regina (entrepreneur i beisbòlista). E panelistanan a duna nan punto di bista riba e pronóstikonan pa e plan maestro di turismo.
E presentashonnan di e Tourism Master Plan Summit ta riba wèpsait di CTB. Pa download e presentashonnan bai riba e link: http://bit.ly/1f0SqS1
