…Den e promé dos lunanan di aña…
WILLEMSTAD – 28 di mart 2018 – Turismo a produsí un impakto direkto di 181 mion florin pa nos ekonomia lokal den e promé 2 lunanan di 2018. Aña pasá e mesun periodo industria di turismo a generá 178 mion florin. Esaki ta un subida di 2% riba e impakto direkto ku turismo tin riba nos ekonomia lokal. 52% di e impakto direkto total ta wòrdu generá for di bishitantenan prosedente di Europa. Turistanan for di Europa ta responsabel pa 93 mion florin. Nort Amérika, Sur Amérika i otro regionnan a generá respektivamente 53, 26 i 8 mion florin.
Un total di 74.180 turista di estadia a keda risibí durante e promé 2 lunanan di 2018. Aña pasá a registrá 74.650 turista di estadia durante e mesun periodo, esaki ta un bahada leve di 1%. Kuater di e shete merkadonan di enfoke a presta bon durante e 2 promé lunanan di aña. Hulanda, Estádos Unídos, Colombia i Brazil a krese ku respektivamente 11%, 13%, 37% i 3%. Den sifranan apsoluto e 4 paisnan aki a kontribuí ku 49.570 turista di estadia kual ta representá 67% di e kantidat total di turista ku a keda risibí e promé 2 lunanan di aña. Un bahada leve di 1% a keda registrá den e kantidat total di anochi pa bishitante den e promé 2 lunanan di aña 2018. Total turistanan a keda 677.628 anochi na Kòrsou. 64% di e kantidat total di anochi pa bishitante registrá ta di turistanan for di Europa, representando 430.884 anochi for di e region aki. E kantidat di anochi registrá pa bishitante for di Europa ta mustra un kresementu di 1%. For di Nort Amérika, e kantidat di anochi pa bishitante a krese ku 15%. Un total di 142.717 anochi a keda registrá durante e 2 promé lunanan di aña.
Turismo di estadia na luna di febrüari 2018
Na luna di febrüari, Kòrsou a risibí un total di 14.791 turista di estadia for di Hulanda kual ta un subida di 8% kompará ku febrüari 2017. Hulanda ta kontinuá komo e merkado prinsipal; 43% di e total di turista risibí ta prosedente for di e pais aki. E di dos pais den region di Europa for di kual nos ta risibí mas turista ta Alemania. Aña pasá ku 2 buelo direkto for di Dusseldorf, un total di 1.903 turista di estadia a keda registrá. E aña aki sin niun servisio direkto for di Alemania un total di 1.106 aleman a bishitá nos pais. Esaki ta un bahada di 42%. Total region di Europa a krese ku 3% na febrüari 2018. Un total di 18.556 turista di estadia a keda risibí.
CTB a registrá un total di 9.260 turista for di Nort Amérika na febrüari 2018. Ku e resultado aki Nort Amérika ta e di dos kontribuidó den kantidat di turista di estadia. For di Canada un total di 3.119 turista di estadia a keda registrá. Esaki ta un bahada di 4%. E bahada di 4% aki ta representá 121 turista ménos na febrüari 2018. Na otro banda, for di Estádos Unídos un kresementu di 14% a keda registrá na febrüari 2018. Total 6.141 turista di estadia a keda risibí. Aña pasá e kantidat di turista ku a bishitá nos for di Estádos Unídos tabata 5.401.
Na febrüari Kòrsou a risibí ménos turista for di Sur Amérika. Un total di 4.014 turista di estadia a keda registrá. Esaki ta debí na e kaida kontinuo di bishitante for di Venezuela, ku 84% ménos turista di estadia kompará ku aña pasá. E echo ku e frontera entre Venezuela i Kòrsou ta será for di 5 di yanüari último tin un impakto negativo riba e sifranan total di luna di febrüari 2018. Solamente 426 venezolano a biaha pa Kòrsou. Aña pasá e kantidat tabata 2.742. Colombia tabatin un hopi bon prestashon kompará ku aña pasá. Un kresementu di 78% a keda registrá pa un total di 1.185 turista di estadia for di Colombia. Brazil tambe a presta bon registrando 5% kresementu na febrüari 2018. Un kantidat di 1.087 brasilero a keda risibí na febrüari e aña aki.
