Turismo a produsí 333 mion florin pa nos ekonomia lokal

June 1, 2017

WILLEMSTAD – 31 di mei 2017 – Turismo a produsí un impakto direkto di 333 mion florin pa nos ekonomia lokal den e promé 4 lunanan di 2017. Aña pasá e mesun periodo industria di turismo a generá 335 mion florin. Esaki ta un bahada leve di 0.8% riba e impakto direkto ku turismo tin riba nos ekonomia lokal. 53.0% di e impakto direkto total ta wòrdu generá for di bishitantenan prosedente di Europa. Turistanan for di Europa ta responsabel pa 176 mion florin. Nort Amérika, Sur Amérika i otro regionnan a generá respektivamente 84, 54 i 18 mion florin.

Un total di 144.271 turista di estadia a keda risibí durante e promé 4 lunanan di 2017. Aña pasá a registrá 165.025 turista di estadia durante e mesun periodo, esaki ta un kaida di 13%. Apesar di e prestashon negativo den sifranan di yegada pa loke ta trata e promé 4 lunanan di aña, tòg ta mira un kresementu den e kantidat di anochi ku e turista ta keda riba nos pais. Sifranan preliminar ta mustra un averahe total di 8.9 anochi pa bishitante durante e promé 4 lunanan di 2017 kompará ku 7.9 anochi na 2016. Un kresementu di 13% a keda registrá durante e promé 4 lunanan di 2017. Total turistanan a keda 1.280.737 anochi na Kòrsou. 63.2% di e kantidat total di anochi pa bishitante registrá ta di turistanan for di Europa, representando 809.208 anochi for di e region aki. E kantidat di anochi registrá pa turistanan for di Europa ta mustra un kresementu di 5%. For di Nort Amérika, e kantidat di anochi pa bishitante a krese ku 1%. Un total di 225.116 anochi a keda registrá durante e 4 promé lunanan di aña. E kresementu den kantidat di anochi pa bishitante tin influensia riba e total ku e turista ta gasta riba nos pais. E último tendensia for di Europa i Nort Amérika ta ku bishitantenan ta kedando un averahe di 1 anochi mas largu, kompará ku e aña anterior.

Turismo di estadia i kantidat di anochi na luna di aprel 2017
Na luna di aprel Kòrsou a risibí un total di 13.512 turista for di Hulanda kual ta un bahada di 4% kompará ku aprel 2016. Turistanan for di Hulanda a keda mas largu kompará ku aña pasá. E averahe den kantidat di anochi pa bishitante na aprel di e aña aki for di Hulanda tabata 10.6 anochi pa persona. Aña pasá aprel, turistanan for di Hulanda a keda un averahe di 10.1 anochi. E kantidat di turista registrá for di Alemania ta mustra un kresementu di 23% ku un total di 2.454 turista. Na aprel 2016 nos a risibí 1.994 turista for di Alemania. E kresementu den sifra dòbel for di Alemania ta e efekto di e fechanan riba kua vakashon di Pasku di Resurekshon a kai e aña aki. Aña pasá vakashon di Pasku di Resurekshon a kai den luna di mart i e aña aki den luna di aprel p’esei ta mira ku e kantidat di turistanan risibí a move pa luna di aprel. E anochi averahe pa persona for di Alemania tambe a krese den aprel ku 21%. Aña pasá, nos a registrá un averahe di 8.6 anochi pa persona, miéntras ku e aña aki nos ta mira un averahe di 10.4 anochi pa persona.

CTB a registrá un total di 6.390 turista for di Nort Amérika na aprel 2017. E kresementu a keda stabil kompará ku aña pasa. For di Canada un total di 1.803 turista di estadia a keda registrá. Esaki ta un kresementu di 15%. For di Estado Unídos un total di 4.587 turista a keda risibí. E pèrdida di 213 turista for di Estado Unídos ta un bahada di 4%. Na aprel Kòrsou a risibí 6.403 bishitante for di Sur Amérika. Esaki ta debí na e kaida kontinuo di bishitante for di Venezuela, ku 58% ménos turista di estadia kompará ku aña pasá. Na aprel Kòrsou a risibí 2.554 bishitante for di Venezuela. E kantidat di turista risibí for di Brazil a baha ku 6%, kual ta un diferensia di 42 brasilero ménos e aña aki. For di Brazil nos a risibí 667 brasilero na aprel e aña aki. Nos a registrá un kresementu di 93% pa un total di 1.519 turista for di Colombia. E esfuerso kontinuo den merkadeo na Colombia kombiná ku buelonan charter for di Bogotá a resultá den un prestashon positivo.

Na aprel a registrá un kresementu den kantidat averahe di anochi pa estadia di 9%. Turistanan a keda un averahe di 8.6 anochi pa persona na aprel 2017. Aña pasá e kantidat averahe di anochi pa persona tabata 7.9. E kantidat di anochi ku e turista a keda riba nos pais na aprel 2017 a konosé un subida di 2%. Un total di 302.547 anochi a keda registrá kompará ku 295.859 na aña pasá.

E relashon entre e kantidat di anochi pa persona i e kantidat di turista di estadia ta mustra ku maske a registrá ménos yegada di turista, e anochi pa kada persona ta mustra un resultado ménos negativo ora tuma nota di e impakto ekonómiko direkto for di industria di turismo.

Download e sifranan

Most recent