Turismo a produsí 520 mion den e promé 8 lunanan di aña

September 23, 2015

Turismo di estadia a subi ku 4%…
WILLEMSTAD- 22 di sèptèmber 2015 – Ofisina di Turismo di Kòrsou (CTB) ta raportá un bahada leve di 2% den luna di ougùstùs pa loke ta trata turismo di estadia. Sifranan preliminar kolektá pa CTB ta indiká ku pa luna di ougùstùs a registrá un total di 39.885 turista di estadia. Na luna di ougùstùs di aña pasa e kantidat di turista tabata 40.556. E bahada den kantidat di turista for di Venezuela i e kambio den fecha di e evento Curaçao North Sea Jazz Festival ta klaramente reflehá den e sifranan di ougùstùs. Aña pasa e evento mayor aki di nos isla a tuma lugá na luna di ougùstùs kual a influensha e sifranan di ougùstùs positivamente. E aña aki e festival a tuma lugá na sèptèmber pa kual motibu e kantidat di bishitante for di eksterior lo bai keda reflehá den e sifranan di sèptèmber 2015.

Merkado di Europa a registrá un bon prestashon di 10% mas turista na luna di ougùstùs. For di e region aki nos a risibí 16.900 turista di estadia kompará ku 15.309 na ougùstùs 2014. For di Hulanda, e pais for di kua nos ta risibí mas tantu turista nos a risibí 12.585 turista kual ta un oumento di 7%. Alemania a registrá un oumentu di 44%. Un total di 2.085 turista a bishita nos pais for di Alemania. Aña pasa e kantidat tabata 1.449. For di Bèlgika un total di 463 turista a keda registrá kual ta un oumento di 7% kompará ku aña pasa.

E region di Nort Amérika na luna di ougùstùs a registrá un kresementu di 11% ku un total di 5.712 turista. Un kresementu di 3% a keda registrá for di Estádos Unídos kual ta representá 4.995 turista. E esfuersonan di merkadeo di sektor públiko i privá lo sòru pa mehorashon den e prestashon di e merkado di Nort Amérika. E buelonan di Air Canada henter aña for di Toronto ta registrando un oumento eksepshonal. Un total di 717 kanades a bishita nos pais durante luna di ougùstùs. Esaki ta un oumento di 127%.

Region di Sur Amérika a registrá un bahada di 16% na ougùstùs ku ta nifiká un total di 12.207 turista kompra ku 14.484 na 2014. E regulashonnan introdusí na Venezuela dor di gobièrnu venezolano ta reflehá bèk den e sifranan di ougùstùs. Luna di ougùstùs a konosé un bahada di 16% ku un total di 8.109 turista. Dor di monitor e situashon na Venezuela pa algun luna kaba, CTB ya a premirá un kaida den e kantidat di bishitante pa kual motibu a kuminsá hinka e esfuersonan di merkadeo den merkadonan kresiente manera Colombia. E kantidat di bishitante for di Colombia a krese ku 1% na ougùstùs ku un total di 1.294 turista. For di Sürnam i Aruba nos a registrá respektivamente 14% i 48% ménos turista.

Sifranan promé 8 lunanan di 2015
Pa loke ta trata e promé ocho lunanan di 2015 turismo di estadia a krese ku 4% di 287.405 pa 297.643. Un total di 10.238 turista adishonal a bishita nos pais registrando kresementu for di Nort Amérika, Sur Amérika i Europa. E regionnan a registrá kresementu di respektivamente 20%, 1% i 4%. For di region di Karibe nos a registrá un bahada di 3%. E kantidat di anochi ku e bishitantenan a keda nos pais e promé 8 lunanan di 2015 ta mustra un bahada leve di 1%. Sifranan preliminar ta mustra un total di 2.550.567 anochi. For di e karchinan di embarkashon i desembarkashon por konstatá ku 68.0% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (31%), esnan di ménos ku 150 kamber (13%), bùngalo (16%), apartamentu (7%) i guesthouse (0.9%). E kantidat di turista ku a keda na un akomodashon no registrá ta representá 33% di e kantidat di turista ku a bishita nos durante e promé 8 lunanan di aña. Akomodashonnan no registrá ta akomodashonnan ku no ta aparesé den CTB su sistema di dato.

Hasiendo uso di e modelo ‘Turistika’, CTB huntu ku MEO a kalkulá ku durante e promé ocho lunanan di 2015, sektor di turismo a generá un impakto direkto di 520 mion florin pa nos ekonomia lokal. E montante aki ta representá un oumento kompra ku aña pasa kaminda un total di 486 mion florin a keda generá. Region di Europa a generá un total di 241 mion florin kual ta 46% di e totalidat. Su tras ta sigui region di Sur Amérika ku 127 mion, Nort Amérika ku 107 mion i e entrada generá for di region Karibe a keda kalkulá na 29 mion florin.

Download sifranan

Most recent