Turismo a produsí 93 mion florin pa nos ekonomia lokal

March 8, 2017

WILLEMSTAD- 8 di mart 2017 – CTB i MEO ta hasi uso di e modelo ‘Turistika’ pa kalkulá e kresementu ekonómiko generá for di industria di turismo. Durante e promé luna di 2017 ta mira un kresementu di 2.8% di impakto direkto pa nos ekonomia lokal, esaki ta ekivalente na 93 mion florin. Aña pasá, esaki tabata 91 mion florin pa e mesun temporada. 53.3% di e impakto direkto a keda generá for di bishitantenan di Europa, nan ta responsabel pa 50 mion florin. Merkadonan Nort Amérika, Sur Amérika i otro regionnan a generá respektivamente 23, 15 i 5 mion florin. E total di loke e turista a gasta ta keda derivá for di e kantidat di anochinan ku nan a keda na Kòrsou. E kresementu ekonómiko generá ta debí ku bishitantenan for di Europa a keda mas largu riba nos pais.

Na yanüari 2017, Kòrsoua registrá 38.744 turista, esaki ta un bahada di 7% kompará ku e mesun luna di aña pasá. Mitar di e kantidat di turista di estadia registrá a bin for di Europa. Total a registrá 19.300 turista for di Europa; tantu Hulanda komo Alemania a demostrá resultadonan positivo. Turismo di estadia for di Nort Amérika a registrá un bahada di 4%. Den luna di yanüari a risibí 8.406 turista for di Nort Amérika. E region ta sostené 21.7% di e kuota di merkado i ta e di dos merkado mas grandi pa kontribuí na e sifranan total den yanüari. Maske tur merkado den Sur Amérika a raportá kresementu signifikante, e 50% kaida den bishitantenan for di Venezuela a kousa un kaida di 22% for di e region. Na yanüari un total di 7.808 turista a yega for di Sur Amérika. For di Karibe a risibí 2.273 turista, esaki ta un kresementu di 2% kompará ku yanüari 2016.

Turismo di estadia na luna di yanüari 2017
Yanüari ta kategorisá komo e luna di mas haltu pa bishitantenan for di Europa. Den e luna aki Kòrsou a risibí 14.993 bishitante for di Hulanda, un kresementu di 1% kompará ku e mesun luna na 2016. Bishitantenan for di Hulanda a keda mas largu i a biaha ku mas miembro di famia kompará ku aña pasá. E averahe di anochi pa kada bishitante for di Hulanda na yanüari 2017 tabata 12.2 anochi, pa persona. Aña pasá na yanüari e bishitante for di Hulanda a keda 11.3 anochi, pa persona. Otro indikadó ta, ku por konkluí ku e bishitante ulandes ta biahando ku famia mas grandi. Tin 21% di kresementu den e grupo di entre 0 i 14 aña di edat, ekivalente na 837 turista den e kategoria di edat aki. Esaki tabata 689 na 2016. Miéntras ku ta tuma nota di mas mucha, tabatin solamente un kresementu leve di 1% den e kategoria entre 45 i 64 aña di edat. Bishitantenan for di Alemania a registrá un kresementu di 11%, ekivalente na 1.831 bishitante. Na yanüari 2016, esaki tabata 1.656.

CTB a registrá un total di 8.406 bishitante for di Nort Amérika na yanüari 2017; Nort Amérika ta e di dos merkado ku a kontribuí mas tantu ora ta trata di yegada di bishitante e luna aki. Canada ta un bon ehèmpel di e aspekto ‘seizoen’. Den e temporada friu, desèmber pa mart, tin un kresementu den konektividat aéreo ku un buelo semanal for di Montreal i 4 buelo semanal for di Toronto. Yanüari ta un temporada haltu pa turismo for di Canada; Kòrsou a risibí 3.270 bishitante. For di Estado Unídos a registrá 5.136 bishitante, un bahada leve di 2%, ku ta representá un pèrdida di únikamente 124 bishitante.

Na yanüari Kòrsou a risibí 7.808 bishitante for di Sur Amérika. Ta promé bes ku CTB ta registrá menos bishitante for di Sur Amérika kompará ku Nort Amérika. Esaki ta debí na e kaida kontinuo di bishitante for di Venezuela ku ta 50% ménos kompará ku aña pasá. Na yanüari Kòrsou a risibí 3.240 bishitante for di Venezuela.

Bishitantenan for di Colombia si a resultá mas positivo ku aña pasá, a registrá un kresementu di 53%, ekivalente na 1.879 bishitante. Kresementu for di Colombia ta un efekto direkto di buelonan charter. Brazil tambe a registrá kresementu; 16% pa un total di 1.259 bishitante den yanüari 2017. E esfuerso kontinuo den merkadeo na Brazil kompañá pa un mihó klima polítiko i ekonómiko tambe ta dunando resultadonan positivo.

Karibe a registrá un kresementu di 2%, ku un total di 2.273 bishitante na yanüari. Aruba a registrá un bahada di 3%, pa un total di 1.027 bishitante. E desaroyo positivo ta spesífikamente debí na kresementu den bishitante for di Repúblika Dominikano ku 10% i Haiti ku 45%.

Sifra kantidat di anochi
Na yanüari nos a registrá un kresementu averahe den kantidat di anochi pa estadia di 10%. Turistanan a keda un averahe di 9.2 anochi pa persona na yanüari 2017. Aña pasá e kantidat averahe pa persona tabata 8.4. E kantidat di anochi ku e turista a keda riba nos pais na yanüari 2017 a konosé un kresementu di 2%. Un total di 358.197 anochi a keda registrá kompará ku 349.557 na aña pasá.

Mas ku mitar di e kantidat total di anochi pa estadia ta for di region di Europa, kual ta 64.1% di e total. Total, bishitantenan for di Europa a keda 229.461 anochi na Kòrsou. Aña pasá e region aki a registrá 213.230 e mesun temporada.

Download e sifranan

Most recent